Бұл туралы Талдықорған қалалық сотының дәлізінде журналистерге сұқбат берген Жетісу облысы прокуратурасы басқармасы бастығының орынбасары Саян Дүйсебаев мәлімдеді. Оның айтуынша, елден қашу туралы іс бойынша жеке іс жүргізілуде, оның алдында жарияланған сот үкіміндегі мерзімге ешқандай қатысы жоқ.
Күдебаевтың сот төрелігінен жалтарғаны туралы 2023 жылдың 3 сәуірінде, яғни оның сотқа кезекті рет келмей қалуы кезінде белгілі болды. Оған халықаралық іздеу жарияланды. Бас прокуратура мемлекеттік шекараны заңсыз кесіп өту фактісі бойынша тергеу басталғанын хабарлады. Бұрынғы полиция басшысы тағы бір баппен сотқа тартылып, сонымен іс шектеледі ме, ол жағы әлі белгісіз.
Серік Күдебаевтың ұсталғаны туралы 27 сәуірде белгілі болды. Ол Түркияда ұсталып, Қазақстанға экстрадицияланды.
28 сәуірде Алматы облысы ПД бұрынғы бастығы Серік Күдебаев 10 жылға сотталды. Ол ҚР ҚК 362-бабының 4-бөлігінде ("Билікті немесе лауазымдық өкілеттіктерін асыра пайдалану"), 146-бабының 2-бөлігінің 1-тармағында ("Азаптау") көзделген қылмыстық құқық бұзушылықтарды жасағаны үшін кінәлі деп танылды.