Павлодарлық әскери қызметшілер Қазақстан құрамасының сапында халықаралық әскери ойындарына қатысады, деп хабарлайды pavlodarnews.kz тілшісі.
Бұл туралы Павлодар облысы бойынша қорғаныс істері жөніндегі департаменттің баспасөз хатшысы Тимур Жағыпаров мәлім етті.
- Халықаралық әскер ойындарында қазақстандықтар 28 байқаудың 14-іне қатысады, - деді Тимур Жағыпаров.
– Қазақстан Қарулы Күштерінің командалары «Әскери халықаралық ойындары-2018» сайысының байқауына қатысу үшін кетті. ҚР ҚК құрама командаларының қатарында 300-ге жуық әскери қызметші бар. Олар Әзербайжан, Армения, Беларусь, Қытай Халық Республикасы мен Ресей Федерациясына аттанды.
Ел аумағында аталмыш байқау шеңберінде «Артиллериялық оқ ату шеберлері», әскери байланысшылардың «Сенімді айла-тәсіл» және ұшқышсыз ұшу аппараттарының «Сұңқардың аңшылығы» сайыстары өтеді. 1-тамызда басталған Қазақстандағы ойындар 9-тамызда аяқталады.
Биылғы жылы Әскери ойындар Ресей, Қазақстан, Әзербайжан, Армения, Беларусь, Иран және Қытай сынды жеті мемлекетте өтеді. Әзірге қазақстандық әскери ұшқыштар Ресей Федерациясының аумағында өткізіліп жатқан «Авиадартс-2018» байқауына қатысу үшін 4++ үлгісіндегі СУ-30СМ майдандық және армиялық авиацияның ұшу аппараттарын тасымалдауды жүзеге асырды.
Аталмыш байқауға қатысу үшін үздік ұшу және инженерлік-авиациялық құрам іріктелді.
Айта кетейік, ұшқыштардың арасында Павлодар облысы Ақтоғай ауданынан шыққан, әуе қарулы күштерінің қолбасшысы, авиация генерал-майоры Дәурен Қосанов бар. Дәурен Қосанов ұшқыштардың іс-қимылдарын басқаратын болады.
Сонымен қатар, Ертіс өңірінен келісімшарт бойынша шақырылғандар әскери әуе күштері мен құрлықтық әскердің, әскери теңіз күшінің сапында өнер көрсетеді.
