Глубокое ауданында өрт сөндірушілер жолда қалған үш ересек адам мен бір баланы эвакуациялады, деп хабарлайды Алтайньюс тілшісі.
Оқиға кеше күндіз, 9-қаңтар күні орын алған. «ВMW X5» автокөлігі Предгорное ауылынан шамамен 7 шақырым жерде сынып қалған көрінеді. Жолаушылар дереу құтқару қызметіне хабарласып, көмек сұраған. Уақыт оздырмай жеткен Верх-Березовка кентіндегі №26-өрт сөндіру бөлімінің қызметкерлері оларды Предгорное ауылына жеткізіп, туған-туыстарына табыстады. Абырой болғанда жолаушылардың ешқайсысы зардап шеккен жоқ дейді құтқарушылар.
Айта кету керек, Шығыс Қазақстанда боран соғып, желдің екпіні секундына 25 метрге дейін жетеді деп ескертілген болатын. Осыған байланысты облыстық ТЖД мейілінше жолға шықпауды ұсынады. Тіпті ақаусыз автомобиль де қар көшкіні немесе бұрқасын салдарынан жолда қалуы әбден мүмкін дейді мамандар.
