Қазақстанда ең көп жемқорлық жайлаған тұрмыстық сала – жоғары білім саласы. Бұл туралы бүгін Мемлекеттік қызмет істері және сыбайлас жемқорлыққа қарсы іс-қимыл агенттігінің брифингінде "Адалдық алаңы" жобасының жетекшісі Жанар Тайжанова мәлімдеді, деп хабарлайды Zakon.kz тілшісі.
Агенттік жемқорлық туралы деректерді жоғары оқу орындарындағы қызметкерлер мен студенттер арасында жүргізген сауалнама нәтижесінде алған. Оның нәтижесінде кейбір басшылар мен мұғалімдер жұмыстан қуылған.
– Қазір біз ЖОО-ларға Қазақ мемлекеттік Заң университеті жанындағы Академиялық адалдық лигасына кіруді міндеттеп отырмыз. Оның нәтижелері туралы алғашқы қорытындылар пайда болған кезде толығырақ хабарлаймыз. Әзірге Лигаға 12 оқу орны кірді, – деді ол.
Сонымен қатар, Тайжанова журналистерді де бұл жұмысқа атсалысуға шақырды: қылмыс деректерін жариялап қана қоймай, жемқорлыққа қарсы күресуге белсене қатысуға үндеді.