ҚР ОСК төрағасы Нұрлан Әбдіров отырыста қоғамдық пікірді айқындайтын сауалнамаларды жариялау кезеңінің аяқталғанын хабарлады.
"Сайлау туралы" Конституциялық заңның нормаларына сәйкес, дауыс беру күніне 5 күн қалғанда және дауыс берілген күні сайлауға байланысты, кандидаттарды қолдау тұрғысындағы қоғамдық пікірді білдіретін сауалнама нәтижелерін, сайлау нәтижелері бойынша болжамдарды және өзге де зерттеулерді жариялауға жол берілмейді. Осы жағынан алғанда, бүгін, 14 қараша, сауалнама нәтижелерін жариялаудың соңғы күні. Ертеңнен, 2022 жылдың 15 қарашасынан бастап қоғамдық пікірді білдіретін сауалнама нәтижелері туралы ақпаратты жариялауға, сондай-ақ қайта басып шығаруға тыйым салынады. ҚР ОСК төрағасы Нұрлан Әбдіров
Сондай-ақ ол жеті заңды тұлға ОСК-ға сауалнама жүргізумен айналысатындығы туралы тиісті хабарлама жолдағанын айтты. Олардың үшеуі үй-жайлардан және дауыс беру пункттерінен тыс дауыс беру күні сауалнама жүргізетіндерін ескертті -exit-poll:
Amanat партиясының қоғамдық саясат институты,
Кешенді әлеуметтік зерттеулер институты – Астана қаласы ИКСИ "СОЦИС-А" ҚҚ
"Ашық қоғам" халықаралық аймақтық зерттеулер институты.
