Әлихан Смайылов Үкімет жұмысы дамыған кәсіпкерлікке негізделген әртараптандырылған экономика құруға бағытталғанын атап өтті. Оның ішінде орта бизнес негізгі локомотивтердің бірі болмақ. Кездесу аясында орта бизнестің жұмыс істеп тұрған жобалары мен жаңа кәсіпорындарды іске қосу бойынша жоспарлары таныстырылды.
Кездесу барысында кәсіпкерлер несиелеу мен субсидиялаудың қолжетімділігін арттыру, жетіспейтін теміржол және көлік жолдарын салу, ауыл шаруашылығы кооперациясын дамыту, экологиялық заңнама нормаларын сақтау және ірі сауда желілеріне бірдей қолжетімділікті қамтамасыз ету мәселелерін көтерді.
"Оңтүстік өңірлердегі іскерлік белсенділік айтарлықтай жоғары, ал кейбір көрсеткіштер бойынша олар көш бастап тұр. Бұл облыстарда дәстүрлі түрде ауыл шаруашылығы, азық-түлік және жеңіл өнеркәсіптегі өндіріс, сондай-ақ сауда-саттық дамыған", — деді үкімет басшысы.
Премьер-министр атап өткендей, кәсіпкерлерді жан-жақты қолдау – үкімет жұмысының маңызды бөлігі. Былтырғы қорытынды бойынша республикада шағын және орта бизнес нысандарының саны 27%-ға, ал осы салада жұмыспен қамтылғандар саны 18%-ға өсіп, 4,1 млн адамға жеткен. Жалпы елдің ЖІӨ-сіндегі ШОБ үлесі 36,5%-ға дейін өсті.
Үкімет басшысы бүгінде Қазақстан экономикасының өсуі 4,8%-ға дейін жеделдегенін, бұл жақсы көрсеткіш екенін айтты. Сонымен қатар үкімет тиісті даму бағдарламаларын іске асыруды жалғастыруда.
"Біздің мақсатымыз – экономикалық өсімді 7-ден 10%-ға дейін арттыру, бірақ бұл үшін банктер қолжетімді несиелер беріп, кәсіпкерлер көтеріп отырған өзекті мәселелерді шешу қажет. Осы мәселелердің барлығы бойынша жұмыс істеп жатырмыз", — деді премьер- министр.
Әлихан Смайылов үкімет аппараты, орталық мемлекеттік органдар мен өңірлер әкімдіктерінен кездесу барысында көтерілген мәселелер мен ұсыныстарды тиісті дәрежеде пысықтап, сонымен қатар орта бизнеспен өткен кездесулер барысында айтылған мәселелердің шешілуіне мониторинг жүргізуді талап етті.
