Үкіметтің баспасөз қызметінің хабарлауынша, оған Қазақстан Премьер-министрінің орынбасары – ұлттық экономика министрі Нұрлан Байбазаров, сондай-ақ Әзербайжан, Түркия, Қырғызстан, Өзбекстан және Мажарстаннан келген делегациялар қатысты.
Кездесудің басты тақырыбы ТМҰ-ға мүше мемлекеттердің экономикалық дамуы мен ынтымақтастығын одан әр нығайту мәселелері болды.
Вице-премьер Қазақстан түркі интеграциясының дамуына ерекше мән беретінін және бауырлас мемлекеттердің бастамалары мен сындарлы ұсыныстарын әрқашан құптайтынын атап өтті.
"ТМҰ аясында құрылған Түркі инвестициялық қоры экономикалық және инвестициялық ынтымақтастықты кеңейтуге, бірлескен инвестициялық жобаларды іске асыруға, елдеріміздің қарқынды өсуі мен өркендеуі үшін капиталдарды, технологиялар мен таланттарды тартуға деген ортақ ұмтылысты айғақтайды", — деді Нұрлан Байбазаров.
ТМҰ елдерінің барлық министрлері Қазақстанның ТМҰ Жасыл қаржы жөніндегі кеңесін, сондай-ақ ТМҰ-ға мүше мемлекеттердің Орталық (ұлттық) банктер Кеңесін құру туралы бастамаларын қолдады.
ТМҰ экономика және сауда министрлерінің келесі кездесуі Түркістанда өтеді. Онда Қазақстанның барлық ТМҰ елдері қолдаған тағы бір бастамасы "TURAN" арнайы экономикалық аймағын ашу жоспарланып отыр.
Айта кетсек, Түркітілдес мемлекеттердің ынтымақтастық кеңесі 2009 жылғы 3 қазанда құрылды. 2021 жылы Кеңес Түркі мемлекеттерінің ұйымы болып қайта құрылды. 2024 жылдың сегіз айының қорытындысы бойынша Қазақстан мен ТМҰ елдері арасындағы өзара сауда көрсеткіші 7,2 млрд долларды құрады. 2024 жылы ТМҰ-ның аясында Түркі инвестициялық қоры яғни, түркі әлемі елдері экономикалық интеграциясының алғашқы бірлескен қаржы институты құрылды.
Қазіргі уақытта ұйымға бес мемлекет мүше: Әзербайжан, Қазақстан, Қырғызстан, Түркия, Өзбекстан.
