Партия төрағасы Айбек Дәдебай олардың Президент Қасым-Жомарт Тоқаевтың Әділетті Қазақстан құру бағытын нық қолдайтынын атап өтті. Оның сөзінше, реформалардың табысы тек мемлекеттік шешімдерге емес, қоғамның өзгерістерге қатысуға дайындығына және прогрессивті саяси күштердің жауапкершілікпен, сындарлы әрі жасампаз әрекет ете алуына да байланысты.
"Әділет" партиясы құрылған кезде біз қарапайым, бірақ қағидатты ұстанымды негізге алдық: әділеттілік болмайынша тұрақты даму мүмкін емес. Әділ ережелер жұмыс істейтін жерде сенім қалыптасады. Сенім бар жерде инвестиция тартылады, кәсіпкерлік дамиды, азаматтық белсенділік артады, қоғамдық ынтымақ пен ұлт бірлігі нығаяды. Сондықтан әділеттілік идеясы түрлі әлеуметтік топ өкілдерінің кең қолдауына ие болды", – деді ол.
Айбек Дәдебайдың айтуынша, салыстырмалы түрде қысқа уақыт ішінде "Әділет" партиясы қоғамдық диалог алаңына айналып, белсенді азаматтарды, кәсіпкерлерді, кәсіби қауымдастық өкілдерін, жастарды, сарапшылар мен қоғам қайраткерлерін біріктірді.
"Бүгін бұл залда съездің қонақтары ретінде "Әділет" партиясын қолдаған 30-дан астам қоғамдық ұйымның көшбасшылары отыр. Олар бізбен бірге Әділетті Қазақстанның негіздерін нығайту жолында жұмыс істеуге дайын", – деді ол.
Сонымен қатар Айбек Дәдебай "Әділет" партиясының мүшелеріне AMANAT қатарын толықтыруға дайын екенін айтып, делегаттарды екі саяси күштің бірігуі туралы шешімді қолдауға үндеді.
Сурет: видео скрині
Дауыс беру қорытындысы бойынша барлық 613 делегат ұсынысты бірауыздан қолдады. Қарсы дауыс бергендер де, қалыс қалғандар да болған жоқ.