ҚБҚ президенті Шахмурат Муталип 1 сәуірде спортшылардың болашақ сыйақысы туралы жаңалықты жариялады.
Сурет: Instagram/boxingkazakhstan
Салтанатты кешкі аста ҚБҚ басшысы жақында Италияда өткен әлемдік іріктеу турнирінде лицензия жеңіп алған боксшылар мен ұлттық құраманың жаттықтырушыларына ақшалай сыйлықтар табыс етті. Боксшыларға 20 000 доллардан, ал бас бапкер Мырзағали Айтжановқа 10 000 доллар табыс етілді. Сонымен қатар, ұлттық құраманың басқа жаттықтырушылары да марапаттарға ие болды.
Бұған қоса, Шахмурат Муталип Париж Олимпиадасында жоғары нәтиже көрсеткен боксшыларға ҚБҚ беретін сыйақы мөлшерін де атап өтті.
- "Алтын" үшін-220 000 доллар.
- "Күміс" үшін-120 000 доллар.
- "Қола" үшін-70 000 доллар.
- 4 орынға-30 000 доллар.
- 5 орын үшін-10 000 доллар.
Сондай-ақ, ҚБҚ 2024 жылғы Олимпиада медальдарын алуға көмектескен сала мамандарын да марапаттауға ниетті. Бас жаттықтырушы мен жаттықтырушылар алқасы боксшы табысының 30 пайызы мөлшерінде қаржылық сыйақы алады.
Осылайша, Олимпиада ойындарында бірінші орын алатын қазақстандық боксшы 220 мың доллар (федерация) және 250 мың доллар (мемлекет) таба алады. Жалпы бұл 470 мың доллар (209 986 714 теңге).
Айта кетейік, бокстан әйелдер құрамасына жаңа басшы тағайындалды. 1 сәуірден бастап Шамиль Сафиуллиннің орнына Елдос Сайдалин келді.
Бүгінде қазақстандық боксшылардың жеті олимпиадалық лицензиясы бар:
- Айбек Оралбай (92 келіден жоғары),
- Қамшыбек Құнқабаев (92 келіге дейін),
- Нұрбек Оралбай (80 келіге дейін),
- Асланбек Шымбергенов (71 келіге дейін),
- Махмуд Сабырхан (57 келіге дейін),
- Сәкен Бибосынов (51 келіге дейін),
- Карина Ибрагимова (57 кг дейін).
