Алматыдағы әскери бөлімде орын алған қайғылы жағдайға қатысты тың ақпарат жарияланды

Қаза тапқан сарбаздың әріптестері Алматыдағы әскери бөлімде орын алған қайғылы оқиғаның мән-жайымен бөлісті. Олар Алмастың ақкөңіл, елгезек жан болғанын айтады, деп хабарлайды Zakon.kz.

ҚР Ұлттық ұланның баспасөз қызметінің мәліметінше, қатардағы жауынгер Алмас Шахимов далалық жаттығуда кенеттен орын алған дауыл кезінде қаруластарын шатыр ішінен қауіпсіз орынға шығаруға көмектескен. Себебі, жел екпінінің күшінен шатырлы қалашықтар құлап, бүлінген.

Алмас өзінің батыл әрекеті арқылы достарына көмектесіп, өзі шатырдан ең соңғысы болып шыққан. Сол сәтте қатты жел жұлып кеткен шатырдың металл жақтауы басына тиген ол ауыр жарақат салдарынан оқиға орнында қаза тапты. Қиын сәтте қызметтестерін құтқарудағы ерлік ісі — батылдықтың, жауынгерлік рухтың, азаматтық жауапкершілік пен қайсарлықтың үлгісі.  ҚР Ұлттық ұланның баспасөз қызметі

Қазақстан Республикасы Ішкі істер министрлігі, Қазақстан Республикасы Ұлттық ұланының Бас қолбасшылығы және "Оңтүстік" өңірлік қолбасшылығы ержүрек жауынгер Алмас Шахимовтың ата-анасы мен жақындарына орны толмас қайғыларына ортақтасып, көңіл айтады.