Маңғыстау облысының әкімі "БерАли" компаниясының бұрынғы қызметкерлерімен кездесті
Сурет: Маңғыстау облысы әкімдігінің баспасөз қызметі
Маңғыстау облысы әкімі баспасөз қызметінің хабарлауынша, кездесуге "ҚазМұнайГаз" АҚ төрағасының орынбасары Дәулетжан Хасанов, "Өзенмұнайгаз" АҚ басшысы Нұрдәулет Қилыбай және жұмыссыз қалған "БерАли" компаниясының бұрынғы қызметкерлері қатысты.
Нұрлан Ноғаев жергілікті атқарушы билік пен "Қазмұнайгаз" компаниясы көтерілген мәселені оңтайлы шешуге ынталы екенін айтып, барлық түйіткілдерді келіссөз үстелінде шешуге шақырды.Кездесуде жиналғандарға жалақы мен еңбек жағдайларын сақтай отырып, "МөлдірМұнайСервис" ЖШС-ға ұзақ мерзімге (3 жыл) жұмыс ұсынылды.
Өңір басшысы "БерАли" мекемесінің бұрынғы қызметкерлерін жұмысқа орналастыру "ҚазМұнайГаз" АҚ ережелері шеңберінде жүргізілетінін атап өтті. Сондай-ақ, ол тендерден ұтылған компанияның қызметкерлері конкурстық рәсімдердің жеңімпазы атанған компанияға жұмысқа орналастырылатынын жеткізді.
Мәселен, 2022 жылдың соңынан бастап осы уақытқа дейін күнделікті 192 шарт бойынша тендерлік рәсімдердің мәртебесіне талдау және мониторинг жүргізілген – бұл шамамен 15 мың адам. Талдау қорытындысы бойынша тендерден ұтылған мердігер компаниялардың қызметкерлері жұмыссыз қалмауы үшін уақтылы шаралар қабылдануда.
Сурет: Маңғыстау облысы әкімдігінің баспасөз қызметі
"ҚазМұнайГаз" АҚ өкілдері "БерАли" мекемесінің бұрынғы қызметкерлері ұсынылған жұмыс орнынан бас тартқан жағдайда, "Өзенмұнайгаз" АҚ өндірістік жоспар бұзылмау үшін конкурстық рәсімдерде жеңген мекемеге кезекте тұрған жұмыссыз адамдарды алуға мәжбүр болатынын атап өтті.
"Сіздердің мұнай-газ саласындағы жұмыс тәжірибеңізді ескере отырып, сәздерге «ҚазМұнайГаз» АҚ қолданыстағы ережелері аясында жұмысқа орналасу ұсынылады. Алайда, «Өзенмұнайгаз» АҚ-на тікелей жұмысқа орналасу туралы талапты қанағаттандыру мүмкін емес, себебі бұл қолданыстағы алгоритм шеңберінде жұмысқа орналасу кезегіндегі Жаңаөзен қаласының басқа тұрғындары үшін әділетсіз болмақ. Мен ақылмен шешім қабылдап, жұмысқа орналасу туралы ұсынысты қабылдауды ұсынамын", - деді Нұрлан Ноғаев.
Әкімнің айтуынша, жергілікті атқарушы органдар қолда бар жұмыс орындарын сақтай отыра, жаңа жұмыс орындарын құру, сондай-ақ оларды тұрғындар арасында әділ бөлу жөніндегі жүйелі жұмысты тұрақты негізде жалғастыратын болады.
