"Бірлестік-2024": Маңғыстау облысында халықаралық оқу-жаттығудың жабылу салтанаты өтті
!["Бірлестік-2024", Маңғыстау облысы, халықаралық оқу-жаттығу, жабылу салтанаты , сурет - Zakon.kz жаңалық 17.07.2024 17:22](https://kaz.zakon.kz/pbi/WEBP/2024-07-17/file-615335ab-22ec-4505-bee8-9a2c7048057f/400x225.webp)
Бұл туралы 2024 жылы 17 шілдеде ҚР Қорғаныс министрлігінің баспасөз қызметі хабарлады.
"Іс-шара Тоқмақ мүйісіндегі Каспий теңізінің қазақстандық секторында практикалық іс-қимылдарды пысықтаумен аяқталды. Оқу-жаттығу жоспары бойынша құрлықтың осы бөлігіне шоғырланған содырлар тобының қалдықтары айтарлықтай шығынға ұшырайды. Біріккен әскерлер тобының бөлімшелері барлау жүргізіп, минаға қарсы қамтамасыз ету, аралық базаны, құрлықтағы және теңіздегі содырларды жою жұмыстарын жүргізді. Операцияға әскери-теңіз десанты мен әуе десанттары, шабуылдау эшелондары, мобильді-атыс тобы қатысты. Олардың әрекеттері зымыран-артиллериялық кемелермен, артиллериямен, армиялық және майдандық авиациямен қолдау тапты", делінген хабарламада.
Сурет: ҚР Қорғаныс министрлігінің баспасөз қызметі
Қатысушыларды оқу-жаттығудың аяқталуымен Қазақстан Қорғаныс министрі генерал-полковник Руслан Жақсылықов құттықтады. Ол қарулы қақтығысты оқшаулау жөніндегі бірлескен операция басқару органдарының үйлесімділігін, жауынгерлік әзірлікті және әскери контингенттер бөлімшелерінің жедел үйлесімділігін жетілдіруге бағытталғанын атап өтті. Әскери қызметшілер бұл тапсырманы сәтті орындап, жауынгерлік жағдайдағы өзара іс-қимылдың оң тәжірибесін алды.
"Оқу-жаттығу жоспарын іске асыру барысы нақты жауынгерлік жағдайларға жақын модельденді. Қайта топтастыру және біріккен әскерлер тобын құру мәселелері пысықталды. Тактикалық эпизодтарды орындау кезінде әртүрлі қару-жарақ пен әскери техника қолданылды, авиация, әскери-теңіз күштерінің кемелері, артиллериялық есептоптар, әуе қорғанысының зениттік-зымырандық кешендері, броньды және инженерлік техника, ұшқышсыз ұшу аппараттары жұмылдырылды", деп нақтылады Қазақстан қорғаныс ведомствосының басшысы.
Сурет: ҚР Қорғаныс министрлігінің баспасөз қызметі
Генерал-полковник Руслан Жақсылықов биыл құрлықта және теңізде өткізілген оқу-жаттығу тек ауқымымен ғана емес, сонымен қатар жеке құрамның кәсіби дайындық деңгейімен де ерекшеленетінін атап өтті.
"Қатысушы елдердің әскери контингенттері бір сапта жауынгерлік міндеттерді келісіп әрі шебер орындауға дайын екендіктерін дәлелдеді. Бірлескен оқу-жаттығу өз мақсатына қол жеткізді және қойылған міндеттер толық көлемде орындалды деп есептеймін", - деп қорытындылады ол өз сөзін.
Сурет: ҚР Қорғаныс министрлігінің баспасөз қызметі
Рәсім барысында Әзербайжан Қорғаныс министрі генерал-полковник Закир Гасанов, Қырғызстан Қорғаныс министрі генерал-лейтенант Бақтыбек Бекболотов, Өзбекстан Қорғаныс министрі генерал-лейтенант Баходир Құрбанов және Тәжікстан Қарулы күштері Бас штабы бастығының бірінші орынбасары генерал-майор Саидасрор Саид Абдуллозода сөз сөйледі. Оқу-жаттығуды ұйымдастырушыларға алғысын білдірген делегация басшылары оның дайындығының жоғары деңгейін атап өтті. Қатысушы елдер қарулы күштерінің ықтимал агрессиялық актілерді тойтаруға жауынгерлік әзірлігін нығайтуға қызмет ететініне сенім білдірді.
Сурет: ҚР Қорғаныс министрлігінің баспасөз қызметі
Оқу-жаттығу қорытындысы бойынша қатысушы елдер қорғаныс министрлерінің бұйрықтарымен бірқатар әскери қызметшілер халықаралық ынтымақтастықты дамытуға қосқан үлесі үшін медальмен және естелік кәдесыйлармен марапатталды. Іс-шара әскери контингенттер легінің салтанатты шеруімен аяқталды.
Сурет: ҚР Қорғаныс министрлігінің баспасөз қызметі
Естеріңізге сала кетейік, бірлескен маневрлер "Оймаша" оқу полигонында, Қарақия ауданының Тоқмақ мүйісінде және Каспий теңізінің қазақстандық акваториясында өткізілді. Оған төрт мың әскери қызметші, 700-ге жуық қару-жарақ пен әскери техника жұмылдырылды.