Қазақстанда қанша мектеп пен балабақша мамандандырылған күзетсіз жұмыс істеп тұр

Қазақстанда қанша мектеп пен балабақша мамандандырылған күзетсіз қалды, сурет - Zakon.kz жаңалық 20.02.2023 14:35

Сурет: pixabay

20 ақпанда өткен брифингте ҚР Ішкі істер министрлігі Күзет қызметін бақылау департаменті бастығының орынбасары Серік Құспанов әлі қанша мектеп пен балабақша мамандандырылған күзетсіз қалғанын айтты, деп хабарлайды Zakon.kz.

БАҚ өкілдері елімізде қанша білім беру мекемесі лицензиялық қауіпсіздік жүйесімен жабдықталғанын, қанша мекемеде күзет жоқ және неліктен екенін сұрады.

"Биыл 1 қаңтарындағы жағдай бойынша тиісті лицензиясы бар жекеменшік күзет ұйымдары 3404 мектеп пен 1371 балабақшаны күзетіп отыр. Оның ішінде дабыл жүйесі арқылы, одан кейін жедел әрекет ету топтарын қалдыру арқылы күзетеді. Дабыл жүйесімен 2050-ге жуық мектеп пен 790 балабақша күзетіледі. Қалған нысандар физикалық қауіпсіздік немесе дабылмен бірге күзетіледі. Сонымен бірге аумақтық департаменттердің берген ақпараты бойынша елімізде 6702 мектеп және 5585 балабақша бар".Серік Құспанов

Нақтырақ мәліметтер алу үшін ол ҚР Оқу-ағарту министрлігіне хабарласуды ұсынды.

"Ұсынылған ақпаратқа сүйенсек, қазір 3 298 мектеп пен 4 214 балабақшада лицензиялық күзет жоқ. Қалған білім беру мекемелері (жоғары оқу орындары мен колледждер. – Ред.) бойынша біз статистика жүргізбейміз. Білім беру ұйымдарында лицензиялық күзет неліктен жоқ деген сұраққа қатысты айтсақ, күзет қызметтерін сатып алуға жергілікті бюджеттен қаражат бөлінеді. Өйткені жеке күзет ұйымдары оларды ақылы негізде көрсетеді. Бұл мәселемен жергілікті атқарушы органдар, әкімдіктер Оқу-ағарту министрлігімен бірлесіп айналысуы керек".Серік Құспанов

13 ақпанда Петропавлда 9-сынып оқушысы мектепке балта мен пышақ әкеліп, соның салдарынан үш бала зардап шекті. Аталған факті бойынша қылмыстық іс қозғалды.

Кейін 15 жастағы бала депрессия диагнозымен психиатриялық бақылауда екені белгілі болды. 2022 жылдың қараша айында Петропавл қаласындағы №4 орта мектепте оқи бастады. Бас мұғалімнің айтуынша, оқушы мүмкіндігінше оқыған, өзін сабырлы, тәртіпті ұстаған.

15 ақпанда 9-сынып оқушысының екі айға қамауға алынғаны белгілі болды.

Оқи отырыңыз