Тоқаев: Экономиканы ынталандыратын әділ салық саясатын жүргізу қажет
Сурет: akorda.kz
"Салық заңнамасының күрделілігі мен тұрақсыздығына бизнестің шағымдануы азаймай тұр. Бұл инвесторлардың сенімін азайтып, бизнеске жоқ жерден мәселе туындатады. Салық органдары кәсіпкерлерді жаппай сотқа тартып жатыр. Атап айтқанда, келісімдерді жарамсыз деп тану жөнінде талап-арыздар көп беріледі. Соттардың жүктемесі едәуір артты. Оларға салықтың дұрыс төленуін тексеру міндеті де жүктелді. Бұған жол беруге болмайды. Жағдайды түзеу үшін шаралар қажет. Үкімет жаңа Салық кодексінде салықтан жалтаруға қарсы іс-қимылдың тиімді механизмін қарастыруы қажет. Сондай-ақ тауарсыз операцияларды анықтаудың нақты критерийлерін анықтау керек". Қасым-Жомарт Тоқаев
Президент заңнама неғұрлым оңай болса, оны қате түсіну ықтималдығы да соғұрлым азаятынын баса айтады.
"Сондықтан рәсімдерді түбегейлі қысқартып, екіұшты тұжырымдарды жою қажет. Барлық даулы жағдай салық төлеушілердің пайдасына қарай түсіндірілуі керек. Елдегі салықтың 80 пайызын 260-қа жуық компания төлейді. Бұл теңгерімсіздікті басқа салық төлеушілердің салықтық түсімін арттыру арқылы түзету керек". Мемлекет басшысы
Тоқаев сарапшылар бағалауын алға тарта отырып, елімізде жұмыспен қамтылған жалпы халықтың төрт миллионы табысынан салық төлемейтіндігі туралы дерек келтірді. Жеңілдетілген салық режимі енгізілгеніне қарамастан, микро және шағын бизнес субъектілері табысын жасырып, ақша айналымын азайтып көрсетеді. Президенттің айтуынша, бизнес субъектілерінің 70 пайызға жуығы жеңілдетілген декларацияда 5 миллионнан аз табыс көрсетіп, осы режим аясындағы түсімдердің 6 пайызын ғана төлейді. Сондықтан салық процедураларын жеңілдетіп, халықпен және бизнеспен тиімді қарым-қатынас жасау арқылы белсенді салық төлеушілерді көбейту жаңа салық саясатының негізгі мақсаттарының бірі болуға тиіс.
"Салық төлеуден жалтарудан, жергілікті бақылаушы органдармен тіл табысып, тәуекелге барудан гөрі салық төлеу тиімді әрі оңай болуы керек. Салық заңнамасын өзгерту жұмыстарын созбалаңға салуға болмайды. Ұлттық экономиканың өсімін инвестицияның тапшылығы шектеп отыр. Негізгі капиталға салынған қаржы статистикасын елдің ертеңіне сенудің басты көрсеткіші ретінде қарастыруға болады".Қасым-Жомарт Тоқаев
Алайда соңғы 10 жылда компанияның таза табысы мен негізгі капиталға салынған инвестицияның арақатынасы 38 пайыздан 29 пайызға дейін кеміді. Басқаша айтқанда, кәсіпкерлер табысын өз бизнесіне қайта инвестициялауға құлықсыздық танытып отыр. Соның салдарынан жаңа өндірістік қуат, жаңа жұмыс орындарын ашу және бюджетке түсетін төлемдері ғана азаймайды.
"Біз позициямыздан айырылып жатырмыз. Негізгі қорлар физикалық және технологиялық тұрғыдан ескіріп, жаңармай отыр. Бұл жалпы проблемаға инвестициялық ағынды әртараптандырудың бәсеңдеуі де әсер етеді. Біздегі шетелдік салымның басым бөлігі (68%) бұрынғыдай шикізат секторына тиесілі. Керісінше қайта өңдеу өнеркәсібі, электр қуатын өндіру, көлік және басқа да салалардан шетелдік инвесторлардың кетуі байқалады". Қасым-Жомарт Тоқаев
Мемлекет басшысы жуырдағы Жолдауымында корпоративтік несиелендіруді қолдауға бағытталған шешімдер айқындалып көрсетілгенін айта келе, ең алдымен, инвесторлар салықтан және басқа да төлем міндеттемелерінен үш жылға босату міндеті тұрғанын жеткізді.
"Үкімет бизнес-қоғамдастықпен бірлесіп, экономиканың басым секторларына инвестиция тартуға ықпал ететін қосымша үш-төрт нақты шараны пысықтауы керек", - дейді Президент.
Айта кетсек, алдында Президент активтерді қайтару кезінде қандай теңгерімді сақтау керектігін айтқан болатын.
