Qazaq Air-ді сатып алуға ешкім ниет білдірмеді

Qazaq Air-ді бірінші әрекетте жекешелендіру мүмкін болмады. Үш ай бойы әуе тасымалдаушысының бақылау пакетін сатып алғысы келетіндер табылмады, деп хабарлайды Zakon.kz.

"Самұрық-Қазына" қоры баспасөз қызметінің хабарлауынша, "Qazaq Air" АҚ-ны жекешелендіру конкурсы өткен жоқ. Үш ай бойы компанияның бақылау пакетін сатып алуға ниет білдірген бірде-бір адам болмады.

Енді қор Qazaq Air әуе компаниясын жекешелендіру бойынша жаңа байқау өткізуі керек. Әуе тасымалдаушысының 49-дан 100%-ға дейінгі акциялары қайтадан аукционға шығарылады. Жаңа байқаудың шарттары мен мерзімі кейінірек жарияланады.

Qazaq Air 18 тамызда жекешелендіруге шығарылды. Ашық екі кезеңді тендер аясында оның бастапқы бағасы 10,2 млрд теңге болатын акцияларының негізгі пакетін сату жоспарланған. Қор "жеке инвесторды тарту Қазақстанның әуе тасымалы нарығын дамыту үшін жаңа мүмкіндіктер жасауға бағытталған" деп хабарлады.

Qazaq Air әуе компаниясын мемлекет 2015 жылы құрған. Ол – тұрақты ішкі және халықаралық рейстерге қызмет көрсететін Қазақстандағы үш ірі коммерциялық әуе тасымалдаушының бірі.