Қазақстанның банк жүйесінде ахуал тұрақты – Қаржы нарығын реттеу агенттігі
Сурет: ҚР Қаржы нарығын реттеу және дамыту агенттігі
Қазіргі уақытта Қазақстанның банк жүйесіндегі ахуал тұрақты. Банк секторының жиынтық активтері 2022 жылғы 1 ақпандағы жағдай бойынша 37 трлн теңге болды. Екінші деңгейдегі банктердің үздіксіз қызметін қамтамасыз ету және банк қызметтерін толық көлемде көрсетуге меншікті капитал мен өтімділіктің айтарлықтай қоры бар.ҚР Қаржы нарығын реттеу және дамыту агенттігі
Агенттік өкілдерінің мәлімдеуінше, банк секторының меншікті капиталы 4,6 трлн теңге болды. Банктер капиталының жеткіліктілігі іс жүзінде заңнамада белгіленген ең төмен талаптардан 3 есе көп.
Өтімділігі жоғары активтер шамамен 11,6 трлн теңгеге немесе активтердің 31,3%-на тең. Өтімділік нормативтерінің ағымдағы мәндері заңнамада белгіленген мәндерден 4 еседей асады.
Екінші деңгейдегі банктер валюталық позицияның белгіленген лимиттерін сақтауда.
Валюта бағамдарының бұлай құбылуы банк секторының қаржылық тұрақтылығына әсер етпейді. Сондай-ақ екінші деңгейдегі банктер ақша-кредит саясаты құралдарының шеңберінде қажетті өтімділікпен қамтамасыз етілуде. Банктердің салымшылары үшін тәуекелдер жоқ. Қазақстандықтардың банктердегі депозиттеріне заңнамаға сәйкес «Қазақстанның депозиттерге кепілдік беру қоры» АҚ кепілдік береді.ҚР Қаржы нарығын реттеу және дамыту агенттігі
Агенттік ақпарат алаңындағы қауесетке құлақ аспауға, сондай-ақ инвестициялық шешімдерді ойланып қабылдауға шақырды.
Қор нарықтарындағы бұл жоғары құбылмалылық сыртқы факторларға негізделген және алыпсатарлық сипатқа ие болуы мүмкін.
Жинаған қаражаттарын сақтап қалу мақсатында Агенттік қаржылық қызметтерді тұтынушылардан барынша мұқият болуды сұрады. Ағымдағы жағдайда ойланбай жасалған әрекеттер қаржылық шығындарға әкеп соқтыруы мүмкін.
Агенттік Украинадағы жағдайға байланысты Ресей мен ресейлік компанияларға қатысты енгізіліп жатқан шетелдік санкциялардың Қазақстан нарығына, атап айтқанда Ресей банктерінің Қазақстандағы еншілес банктеріне ықтимал ықпалын мұқият түрде қадағалап отыр.
Агенттік атап өт, «Альфа-Банк» ЕБ АҚ (Қазақстан) қатысты бүгін түнде енгізілген АҚШ-тың санкциялық пакеті банктің операциялық қызметіне қатысты емес. Банк уақытша жаңа еурооблигацияларды шығара алмайды немесе акциялар шығарылымын орналастыра алмайды, бірақ бұл шектеулер іс жүзінде жария емес компанияға қатысты емес. Банк әдеттегідей жұмыс істейді: Visa және Mastercard карталары бойынша төлемдер бүкіл әлем бойынша қолжетімді, валюталық аударымдар шектеусіз жүргізілуде, мобильдік қосымша мен офистер қалыпты жағдайда жұмыс істейді.
Қазіргі кезде «Сбербанк» АҚ ЕБ клиенттері – жеке және заңды тұлғалар үшін олардың қаражаттары мен сервистері толық көлемде қолжетімді.
Шоттардан теңгемен және шетел валютасымен ақша алу және оларды толықтыру бойынша операциялар офистерде, банкоматтарда, мобильдік қосымшаларда және басқа да қызмет көрсету арналарында шектеусіз жүргізілуде. Тауарлар мен қызметтер үшін ақы төлеу, барлық төлем жүйелерінің пластикалық карталары бойынша аударымдар мен операциялар толық көлемде жүзеге асырылады. Банк валюта айырбастауды тоқтатпайды.
Енгізілген санкциялар клиенттер қаражатының сақталуына және қолжетімділігіне әсер етпейді. Банктің қалыптасқан жағдайда үздіксіз жұмысты қамтамасыз ету үшін барлық қажетті ресурсы бар.ҚР Қаржы нарығын реттеу және дамыту агенттігі
Банк ВТБ (Қазақстан) АҚ ЕҰ қаржылық көрсетілетін қызметтердің негізгі түрлерін көрсетуді жалғастыруда. Барлық шоттар белсенді және клиенттердің қаражаттары банк бөлімшелерінде, банк банкоматтарында, оның ішінде басқа екінші деңгейдегі банктерде де, қашықтан басқару арналарында да қол жетімді. Оларды бұрынғысынша Қазақстан аумағында ұлттық валютада банк операцияларын жүргізу үшін пайдалануға болады. Банк сондай-ақ халық пен заңды тұлғаларды кредиттеуді шектемейді.
Қазіргі уақытта ресейлік банктердің еншілес банктерінде уәкілетті органның ең төменгі талаптарынан едәуір асатын капиталдандыру және өтімділік көрсеткіштері бар, кредиторларға қаражаттың қайтарылуын қамтамасыз ететін ұзақ мерзімді қорландырудың тұрақты қоры бар. Банктер жеке тұлғалардың салымдарына кепілдік беру жүйесінің қатысушылары да болып табылады.
Агенттік өкілдері оқиғалардың өрбуін мұқият қадағалауды жалғастыратынын және Ұлттық банкпен бірлесе отырып, елдегі қаржы жүйесінің тұрақтылығын қамтамасыз ету және депозиторларды қорғау үшін барлық қажетті шараларды қабылдайтынын мәлімдеді.
