"Қазақстанда 85 мың теңгеге күн көруге болады": Ордабаев бұл сөзді неге сүйеніп айтқанын түсіндірді

Сурет: Zakon.kz

Астанада Еңбек күніне арналған форум аясында Еңбек және халықты әлеуметтік қорғау вице-министрі Олжас Ордабаев алдында айтқан "Қазақстанда 85 мың теңгеге өмір сүруге болады" деген сөзін түсіндірді, деп хабарлайды Zakon.kz тілшісі.

Олжас Ордабаевтың "Қазақстанда 85 мың теңгеге өмір сүруге болады" деген сөзі әлеуметтік желіде тарап, халықтың ашуын тудырған еді. Шенеунік бұл тұжырымды неге сүйеніп айтқанын түсіндірді.

"Мен қазақстандықтар 85 мың теңгеге өмір сүруі керек деп айтқан жоқпын. Жоқ, әрине. Бұл мемлекет белгілейтін ең төменгі кепілдендірілген деңгей, жұмыс берушілер жалақыны одан төмен белгілей алмайды", – деді вице-министр.

Оның айтуынша, еңбек нарығында одан да жоғары жалақы бар, оның мөлшері біліктілікке, білім мен дағдыға байланысты. Вице-министр депутат Ринат Зайытовтың "Қазақстандағы ең төменгі жалақы 300 мың теңгеден төмен болмауы керек" деген пікіріне де түсініктеме берді.

"Бұл, біріншіден, экономикалық көрсеткіш, оны жалпы алғанда экономистер қарастыруы керек, депутаттың ұсынысын Қаржы министрлігімен бірлесе отырып талқылаған дұрыс: бюджет қаншалықты көтере алады", – деді Олжас Ордабаев.

29 тамызда Еңбек және халықты әлеуметтік қорғау вице-министрі Назгүл Сағындықова 85 мың теңге адамның өмір сүру сапасына жеткіліксіз екенін айтты.

Оқи отырыңыз