2024 жылы қазақстандықтар арасында ақшаның қандай түрлері танымал болды

Халықтың қолма-қол ақшасыз операцияларының өсімінде оң үрдіс сақталып отыр. Бұл туралы 2025 жылғы 14 ақпанда Ұлттық банк мәлімдеді, деп хабарлайды Zakon.kz.

Таратылған ақпаратқа сүйенсек, 2024 жылдың қорытындысы бойынша, қолма-қол ақшасыз операциялар санының өсуі 13,4% (жалпы саны – 12,8 млрд операция), көлемі – 17% (жалпы көлемі – 166,1 трлн теңге) болды. Мәселен, 2024 жылы халық орташа есеппен 453,6 млрд теңгеге күн сайын қолма-қол ақшасыз 35,1 млн операция жүргізді.

2024 жылғы халық операцияларының динамикасы (трлн теңгемен)

Сурет: ҚР Ұлттық Банкі

"2024 жылы халық іске асырған барлық транзакция ішінен саны жағынан 98%-ы және көлемі жағынан 87%-ы – қолма-қол ақшасыз операциялар. Бұл өз кезегінде қаржылық технологияларға халықтың жоғары сенімін білдіреді, себебі қолма-қол ақшасыз транзакция жүргізу ыңғайлы әрі уақыт жағынан өнімді".ҚР Ұлттық банк баспасөз қызметі

2024 жылы қолма-қол ақшасыз транзакциялардың негізгі үлесі банктердің онлайн сервисі арқылы жүргізілді (қолма-қол ақшасыз транзакциялар көлемінің 90%-ы).

"Бұл ретте банктердің онлайн-сервисін пайдаланушылар саны 13%-ға (25,9 млн дейін) ұлғайды. Бір жыл ішінде интернет пен мобильді банкингтің бір пайдаланушысына келетін онлайн-транзакция көлемі орта есеппен 7%-ға (6,1 млн теңгеге дейін) өсті",- делінген ақпаратта.

Клиент банктің онлайн-сервистерін бір рет және одан да көп пайдаланған кезде қолданушылар әрбір банк бойынша жеке-жеке есепке алынады.