Қазақстанда кімдер мүлік салығынан босатылған

Маңғыстау облысы бойынша Мемлекеттік кірістер департаменті бүгін, 2025 жылғы 25 сәуірде еліміздің азаматтары қандай жағдайда мүлік салығынан босатылатындығын мәлімдеді, деп хабарлайды Zakon.kz.

Ведомство әлеуметтік желілер мен мессенджерлерде зейнеткерлер жеке тұлғалардың мүлік салығынан толығымен босатылатындығы туралы ақпаратқа түсініктеме берді. 

"Дегенмен бұл ақпарат шындыққа жанаспайды.Қазақстан Республикасының Салық кодексіне сәйкес бөлек тұратын зейнеткерлер заңды мекенжайы (олардың тұрғылықты мекенжайы) бойынша тек қана зейнеткерлер тіркелген барлық салық салу объектiсінiң жалпы құнынан айлық есептік көрсеткiштің 1000 еселенген мөлшері шегiнде босатылады. Есептеу барысында республикалық бюджет туралы заңда белгіленген және тиісті қаржы жылының 1 қаңтарына қолданыста болатын айлық есептік көрсеткiш мөлшері қолданылады",- делінген ақпаратта. 

Сонымен қатар, келесі тұлғалар да жеке тұлғалардың мүлік салығынан босатылады: 

1. айлық есептік көрсеткiштің 1000 еселенген мөлшері шегiнде – Кеңес Одағының батырлары, Социалистiк Еңбек ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелi Даңқ орденiмен және "Отан" орденiмен наградталған адамдар, «Батыр ана» атағымен және «Алтын алқа» алқасымен наградталған көп балалы аналар;
2. айлық есептік көрсеткiштің 1500 еселенген мөлшері шегiнде – Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталмаған адамдар, мүгедектігі бар адамдар, сондай-ақ Салық кодексінің 526-бабының 2-тармағында белгіленген өзге де тұлғалар босатылады.

"2024 жыл үшін мүлік салығын төлеу мерзімі 2025 жылдың 1 қазанында аяқталатынын еске саламыз". Маңғыстау облысы бойынша Мемлекеттік кірістер департаменті

Бұған дейін Қазақстандағы ең ірі әуе компаниясына 4 миллионға жуық айыппұл салынғандығы хабарланған болатын.