Қазақстанда су тасқынына қарсы шараларға 156 техника, 74 су сору құралы жұмылдырылды
Сурет: Төтенше жағдайлар министрлігі баспасөз қызметі
Кейінгі тәулікте өңірлерде тұрғын үйлерді су басуға жол берілген жоқ. Қазір Ақмола және Ақтөбе облыстарындағы облыстық маңызы бар жолдардың 4 учаскесінде, Қарағанды, Ақмола, Ақтөбе, Қостанай облыстарындағы жергілікті маңызы бар автожолдардың 11 учаскесінде, Ақтөбе облысының жергілікті маңызы бар учаскесіндегі бір көпірде су тасқыны болып жатыр.
Ақмола, Ақтөбе, Қарағанды облыстарында, Нұр-Сұлтан қаласында жергілікті атқарушы органдар мен ТЖМ күштерімен аула аумақтары мен көшелерден 126,6 мың м3 еріген қар суы сорылды.
Ақмола, Шығыс Қазақстан, Ақтөбе, Қарағанды облыстарында инертті материалдары бар 4 895 қап төселді.
Жұмыстарға ТЖМ, ІІМ, жергілікті атқарушы органдардан, үкіметтік емес ұйымдардан 657 адам, 156 бірлік техника, 74 су сору құралы және 5 жүзу құралы жұмылдырылды, – деп хабарлады Төтенше жағдайлар министрлігінің баспасөз қызметі.
Ақмола және Шығыс Қазақстан облыстарында су тасқынына қарсы іс-шараларға (қаптар төсеу, топырақ үйіп бекітілген жерлерді нығайту, еріген қар суын сору) ТЖМ 52859 және 68303 әскери бөлімдерінің 55 адамы мен 6 бірлік техникасы тартылды.
