Жоғарғы сот Сейітқазы мен Әсет Матаевтарды толық ақтады
Сурет: Facebook/Өміржан Әбдіхалықұлы
Бұл туралы Қазақстан Республикасы Жоғарғы Сотының баспасөз хатшысы Айдос Сәдуақасов мәлім етті.
Жоғарғы сот бас прокурордың наразылығы бойынша сотталған Сейітқазы мен Әсет Матаевқа қатысты қылмыстық істі қарады. 24 маусымда Жоғарғы Сотқа берілген наразылықта Бас прокурор іс үшін маңызды мән-жайлар бойынша сот тергеуінің толық жүргізілмеуіне байланысты іс бойынша қабылданған сот актілерінің күшін жоюды және қылмыстық істі сотқа жіберуді сұрады. Бүгін, 19 шілдеде, жеті судьядан тұратын Жоғарғы Соттың қылмыстық істер жөніндегі сот алқасы наразылықты қарап, сот актілерінің күшін жойды», - деп жазды ол Facebook-те.
Оның айтуынша, "іс бойынша Сейітқазы мен Әсет Матаевтардың әрекеттерінде қылмыс құрамының болмауына байланысты тоқтатылды".
Айдос Сәдуақасов түсіндіргендей, Қазақстан Республикасының Қылмыстық-процестік кодексінің 39-бабына сәйкес қылмыстық процесті жүргізуші органның заңсыз әрекеттерімен келтірілген зиянды өтеу құқығы негізделген деп танылады.
Сонымен қатар, ҚР Жоғарғы Сотының баспасөз хатшысы «наразылық ішінара қанағаттандырылды» деп қосты.
Әсет Матаев та ақталғанын жариялады.
Біз толық ақталдық! деп жазды ол Facebook-те.
Еске салайық, Сейітқазы Матаев пен оның ҚазТАГ ақпарат агенттігін басқаратын ұлы Әсет аса ірі көлемде бюджет қаражатын жымқырды және салық төлеуден жалтарды деп айыпталған болатын.
2016 жылы бірінші сатыдағы сот Сейітқазы Матаевты алты жылға бас бостандығынан айыру жазасын жалпы режимдегі колонияда өтеу және мүлкін тәркілеу, ал оның ұлы Әсет Матаевты бес жылға жалпы режимдегі колонияда өтеу туралы үкім шығарған. Соттың апелляциялық алқасы Сейітқазы мен Әсет Матаевқа бас бостандығынан айыру түріндегі негізгі үкімді қалдырып, қосымша бөлігін ғана өзгертті.
2017 жылдың желтоқсан айында Сейітқазы Матаев бостандыққа шықты.
2022 жылдың 5 шілдесінде Қазақстан Республикасы Журналистер одағының төрағасы Сейітқазы Матаев пен оның ұлы Әсеттің мүддесін қорғайтын адвокат Джохар Өтебеков сот үкіміне Бас прокуратура наразылық келтіргенін айтты.
