Қазақстанда ең ірі теміржол желілерінің құрылысы басталды
Сурет: Telegram/KZgoverment
"Қуатты өңірлер – ел дамуының драйвері" ұлттық жобасы аясында ұзындығы 836 шақырым болатын жаңа теміржол желісі іске қосылады. Жаңа бағыттардың салынуы отандық өнімді экспортқа тоқтаусыз шығаруға және еліміздің транзиттік әлеуетінің артуына ықпал етпек.
Құрылысты бастау салтанатына телекөпір режимінде Қазақстан Республикасының премьер-министрі Әлихан Смайылов қатысты.
"Бүгін біз ең ірі теміржол жобасын бастағалы жатырмыз. Ол учаскенің өткізу қабілетін 5 есеге – 12-ден 60 жұп пойызға дейін ұлғайтады, сонымен қатар қазақстандық экспортттаушылардың осы бағыттағы тасымалдау мәселесін толығымен шешеді", – деді Әлихан Смайылов.
Премьер-министр жобаны іске асыру барысында жергілікті қамту үлесі 80 пайыздан асатынын атап өтті.
Жаңа жолдар салынса, 20 жыл ішінде бюджет кірісін одан әрі 4,1 трлн теңгеге арттырады деп күтілуде.
Құрылыс барысында 419 жасанды құрылысты (5 үлкен көпір, 87 шағын және орта көпір, 288 су өткізгіш құбырлар, 14 жол өткелдері), сондай-ақ энергетика және коммуникация нысандарын салу жоспарланған. Құрылыс 2025 жылдың 4 тоқсанында аяқталуы тиіс.
