Алматыда қар қашан тоқтайды
Сурет: Zakon.kz
Алматы қаласының коммуналдық инфрақұрылымды дамыту басқармасы таңғы сағат 06:00-ден бастап қалада қалың қар жауа жауа бастағанын, екі сағатта қар жамылғысының биіктігі 3 есеге артқанын мәлімдеді.
"4 қаңтар күні сағат 08:00-дегі жағдай бойынша тау бөктерінде 15-18 см, қалада 10 см-ге дейін қар жауды. Шымбұлақта жауған қардың қалыңдығы 60 см болды", – делінген хабарламада.
Қар жауғанға дейін қаланың барлық аудандарында құм себушілер кезекшілікке шыққаны мәлім болды.
"Қар жауа бастағаннан бері жолдарға көктайғақ болдырмайтын материалдар шашыла бастады. Полицияның патрульдік көліктерінің сүйемелдеуімен 17 қар күрейтін колонна ұйымдастырылды. Қар шығаруға 32 тиегіш пен жүкті өзі аударатын 70 көлік жұмылдырылды", – деп мәлімдеді ведомство өкілдері.
Сондай-ақ, таңертеңнен бері қала жолдарында 524 арнайы техника мен 1240-қа жуық жолшы жұмыс істеп жатыр.
"Қазгидромет" РМК ұсынған болжамға сүйенсек, 4 қаңтарда Алматыда көшпелі бұлт шығады, қар жауады. Ауа температурасы Цельсий бойынша екі градусқа дейін көтеріледі.
Төтенше жағдайлар министрлігі қарлы боран мен көктайғақ салдарынан тас жолдардың 109 учаскесі жабылғанын, оның 41-і республикалық және 68-і облыстық маңызы бар жолдар екенін хабарлады. Блок-бекеттерде 600 автокөлік тұр.
