21 наурызда Қазақстанның басым бөлігінде күн ашық болады

Синоптиктер Қазақстандағы 21 наурыз күнгі ауа райы болжамын ұсынды, деп хабарлайды Zakon.kz.

"Қазгидромет" РМК мәліметі бойынша, республиканың оңтүстік бөлігінде атмосфералық фронтальды учаскелердің өтуімен тұрақсыз ауа райы сақталады, жауын-шашын жауады.

Синоптиктердің хабарлауынша, түнде оңтүстікте қатты жауын-шашын (жаңбыр, қар) жауады, ал Қазақстанның басым бөлігінде антициклонның ықпалымен жауын-шашынсыз ашық ауа райы сақталады.

Республикада тұман болады. Батыста, оңтүстік жартысында жел күшейеді. Күндіз батыста шаңды дауыл, республиканың оңтүстігінде найзағай ойнайды.

Астанада көшпелі бұлт шығады, жауын-шашынсыз. Оңтүстіктен екпіні секундына 2-7 метр жел соғады. Ауа температурасы -16-18°С, күндіз -1-3°С.

Алматыда көшпелі бұлт шығады, жауын-шашынсыз. Жел екпіні секундына 2-7 метр болады. Ауа температурасы түнде -1-3°С, күндіз +9+11°С.

Шымкентте көшпелі бұлт шығады. Түннің бірінші жартысында жаңбыр жауады, найзағай ойнайды. Шығыстан соғатын жел екпіні секундына 8-13 метр. Ауа температурасы түнде +6+8°С, күндіз +18+20°С.