Шымкентте қоғамдық автобустан өрт шықты

автобус, сурет - Zakon.kz жаңалық 16.06.2023 00:29

Сурет: otyrar.kz

Шымкентте жолаушыларды тасымалдайтын №150 бағыттағы қоғамдық көліктен өрт шықты. Оқиға кеше, 15 маусымда сағат 20:00 шамасында Тәуке хан даңғылының бойында болған, деп хабарлайды Zakon.kz.

Куәгерлердің айтуынша, өрт автобустың тежегішінен шыққан. Жұмыс күні аяқталып, автобус паркіне бара жатқан автобус жол бойында түтеп, өртене бастаған. Жолдан өтіп бара жатқан өзге қоғамдық көлік жүргізушілері өрт сөндіргіш құралын алып, жаппай көмектескен. Осылайша, дер кезінде жалынды ауыздықтаған.

"Егер өзге автобустар болмағанда өртті сөндіру қиын болатын еді. Өйткені бір өрт сөндіргішпен сөндіру қиын. Бәрі жабылып жүріп әрең тоқтатты", - дейді ақпаратты otyrar.kz редакциясына жеткізген оқиға куәгері.

Оқиға орнына кейін өрт сөндірушілер жетіп, жалынды толық сөндірген.

Оқи отырыңыз