Қазақстанда балалар үйінің саны екі есе азайған – Оқу-ағарту министрлігі

Сурет: pixabay

ҚР Оқу-ағарту министрлігінің Балалардың құқығын қорғау комитетінің хабарлауынша, кейінгі 10 жылда балалар үйінің саны мен ондағы тәрбиеленушілер саны 2 есе азайған.

Министрлік президент тапсырмасы бойынша балалар үйлері балаларды қолдау орталықтарына айналғанын айтты. Үкімет кәсіби қабылдаушы отбасы институтын енгізу бойынша заңнамалық нормаларды әзірлеген. Бұл одан да көп баланы отбасылық қамқорлықпен қамтуға мүмкіндік береді.

Жетім және ата-анасының қамқорлығынсыз қалған балаларды отбасыларға орналастырудың 4 балама түрі бар:

бала асырап алу;
қорғаншылық (қамқоршылық);
патронат;
қабылдаушы отбасы.

Қазіргі кезде 3 мыңнан аса бала 116 интернаттық ұйымда тәрбиеленіп жатыр. Кейінгі 10 жылда 7 мың бала өз отбасын тапты.

"Балалар үйінің азаюына интернат ұйымдарын деинституционализациялау, отбасылық орналастырудың балама нысандарын енгізу және жетім балаларды тәрбиелеп отырған отбасыларды материал жағынан қолдау саясаты әсер етті", – деді Балалардың құқығын қорғау комитеті төрағасы Насымжан Оспанова.

Сонымен қатар ата-анасының қамқорлығынсыз қалған әр балаға колледждер мен жоғары оқу орындарында білім алуға грант беріліп, шәкіртақы төленеді.

Оқи отырыңыз