Мұғалім оқушының басын тақтаға ұрды: Сотқа дейінгі тергеп-тексеру басталды

Тақта, мұғалім, оқушының басы, Ақмола облысы, әлеуметтік желі, сурет - Zakon.kz жаңалық 05.10.2023 18:14

Сурет: pixabay

5 қазанда әлеуметтік желіде мұғалімнің оқушының басын тақтаға ұрған видеосы пайда болды. Оқыс оқиға Ақмола облысы Жібек жолы ауылының мектебінде болғаны анықталды. Өңір полициясы болған жағдайға қатысты түсініктеме беріп, сотқа дейінгі тергеу басталғанын нақтылады, деп хабарлайды Zakon.kz.

Аталған оқиғаға сәйкес, ҚР Қылмыстық кодексінің 140-бабының 2-бөлігі бойынша сотқа дейінгі тергеп-тексеру басталды (кәмелетке толмағанды тәрбиелеу жөніндегі міндеттерді ата-анасының немесе осы міндеттер жүктелген өзге адамның, сол сияқты педагогтің немесе кәмелетке толмағанды қадағалауды жүзеге асыруға міндетті оқу, тәрбие, емдеу немесе өзге де мекеменің басқа да қызметкерінің осы міндеттерді орындамауы немесе кәмелетке толмағандарға қатыгездік таныту).

Сондай-ақ, сотқа дейінгі тергеп-тексеру шеңберінде тиісті сараптамалар тағайындалғаны нақтыланады.

"ҚР ҚІЖК-нің 201-бабына сәйкес өзге ақпараттар жария етуге жатпайды", делінген полиция хабарламасында.

Видео авторы баланың артына бұрылып, қалам сұрағаны үшін таяқ жегенін айтады.

Сонымен қатар, облыстың білім басқармасы аталған факті бойынша барлық мән-жайды анықтау үшін аудандық білім бөлімінің комиссиясы мектепке аттанғанын атап өтті.

Оқи отырыңыз