Сарыағашта 5 жасар қыздың өлімінен соң басы дауға қалған сот төрағасы жаңа қызметке тағайындалды
Сурет: otyrar
Бұл туралы ол өзінің Facebook парақшасында жазды.
"Бүгін Сарыағаш аудандық сотының төрағасы лауазымынан босатылған соң, судья ретінде жұмысқа түстім. Бұл қадам маған оңай болған жоқ", - деп жазды судья.
Нұрқазы Шетенов бұған дейін адам өлтіргені үшін түрмеде жазасын өтеп шығып, одан кейін танысын балтамен ұрған ер кісіге (5 жасар қызды зорлап, пышақтап өлтірген педофил) неліктен 3 жыл мерзімге бас бостандығын шектеу жазасы берілгенін түсіндірген.
"Негізі, Қазақстан Республикасының Қылмыстық Кодексінің (Әрі қарай-ҚК) 106-бабы 1 бөлігі "Денсаулыққа қасақана ауыр зиян келтіру" санкциясында үш жылдан сегіз жылға дейiнгi мерзiмге бас бостандығын шектеуге не сол мерзімге бас бостандығынан айыру жаза қарастырылған.С.Гаийбназаровқа бас бостандығынан айырмайтын жазаны төмендегі жағдайларға байланысты тағайындадым:С.Гаийбназаров бұрын, 31.07.2006 жылы ҚК-нің 96-бабының 1-бөлігімен кінәлі деп танылып, сотты болған.Алайда, қылмыстық іске тіркелген анықтамаға сәйкес, 2014 жылы бас бостандығынан айыру жазасы шартты түрде жазаға ауыстырылған болса, 14.06.2016 жылы жазадан босатылған. Ал, 14.01.2022 жылы оның соттылығы толығымен жойылған.ҚК-нің 79-бабының 9-бөлігіне сай, С.Гаийбназаровқа үкім шығару кезінде оның бұрынғы соттылығы жойылған, яғни, бұрынғы соттылығы бойынша барлық қылмыстық-құқықтық салдарлардың күшi жойылған.Сотталушының жазасы 2014 жылы шартты түрде жазаға ауыстырылған кезден бастап, қылмыс жасағанға дейін, яғни 2023 жылға дейін 9 жылға жуық уақыт аралықта бостандықта жүріп тұрғылықты жерінде тұрған. Бостандықта жүрген кезінде қандай да бір жауапқа тартылмаған.Сотқа дейінгі тергеп - тексеру кезінде жәбірленуші Д.Тажиматовтан сотқа дейінгі жауаптарды сақтау бойынша Сарыағаш аудандық сотында жауап алынған. Өз жауаптарында жәбірленуші сотталушы С.Гаийбназаровқа кешірім бергенін, қылмыспен келтірілген зиянның есесі қайтарылғанын, сөйтіп, өзара татуласқанын айтып, сотталушыға жеңіл жаза тағайындауды сұраған. Сот отырысында іс құжаттары зерделеніп, жәбірленушінің осы жауаптары толық тексеріліп, қаралды.Сонымен қатар, сотталушы С.Гаийбназаров сот тергеуінде өзінің қылмыстық әрекетін толық мойындап, істеген ісіне өкінетінін айтып, кешірім сұрады.Сотталушының жауаптылығын жеңілдететін мән-жайлар жиынтығын, жәбірленушіге қылмыспен келген залалдың орнын толтырғанын, жәбірленушінің кешірім бергенін ескеріп, балама бас бостандығын шектеу жазасы тағайындалған". Нұрқазы Шетенов
Еске салайық, Сарыағаш ауданы Жібек жолы ауылында ойнап жүрген 5 жасар Еркежан Нұрмаханды көршісі үйіне алдап кіргізіп, кейін зорлаған. Кейін 48 жастағы ер адам кішкентай қызды айуандықпен өлтірген. Үйінен шығып, оралмаған бүлдіршінді бүкіл ауыл болып жан ұшыра іздеген еді. Кешкі уақытта қыздың мәйіті көршісінің үйінен табылды. Оқиға 2023 жылғы 13 шілде күні болған. Сот үкімімен педофил кінәсі дәлелденіп, өмір бойына бас бостандығынан айырылды. Сонымен қатар сотталушыға химиялық кастрация жасалады.
Айта кетейік, 48 жастағы ер адам 2006 жылы адам өлтіргені үшін 10 жылға сотталып, 2014 жылы шартты мерзімінен бұрын босатылған. Ал биыл көктемде өзімен бірге жалдамалы жұмысшы боп істейтін танысын жанжал кезінде балтамен ұрғанына қарамастан, судья Нұрқазы Шетенов оған 3 жылға бас бостандығын шектеу жазасын тағайындаған.
5 жасар қыздың өлімінен кейін аудандық сот төрағасы Нұрқазы Шетенов өз еркімен жұмыстан кету туралы өтініш жазған. Ол 6 қазанда аудандық сот төрағасы қызметінен босатылып, осы соттың судьясы қызметіне тағайындалды.
