Бағдат Мусин анықтама талап еткендерге айыппұл салуды ұсынды

Қағаз анықтама, Цифрлық даму министрлігі, электронды құжат, сурет - Zakon.kz жаңалық 21.11.2023 11:54

Сурет: freepik

21 қарашада өткен үкімет отырысында Цифрлық даму, инновациялар және аэроғарыш өнеркәсібі министрі Бағдат Мусин қағаз анықтамаларды заңсыз талап еткендерге әкімшілік жауапкершілік енгізуді ұсынды, деп хабарлайды Zakon.kz тілшісі.

Бағдат Мусин бұған дейін азаматтар жыл сайын бір жерден екінші жерге 50 миллион анықтама тапсыруға тиіс болғанын айтты.

"Біз оны цифрлық форматқа көшірдік. Дегенмен талдау қағаз анықтамаларды сұрау мәселесі толық шешілмегенін көрсетті. Жұмыс берушілер мен мектептер әлі де анықтама талап етеді. Келесі жылы екі уәкілетті министрлікпен бірлесіп, бұл мәселені толығымен шешеміз. Анықтаманы талап еткені үшін әкімшілік жауапкершілікті енгізуді сұраймыз", – деді министр.

Ведомство басшысы нақты мысал келтіре отырып жүйе қалай жұмыс істейтінін түсіндірді.

"Тағы бір кейіс. Жыл сайын 106 мыңнан астам студент екі аптаға жуық уақыт әскери комиссариатқа ұсыну үшін оқу орындары мен медициналық ұйымдардан анықтамалар жинайтын. Енді студент екеніңді дәлелдеудің қажеті жоқ. Үш министрлiктiң деректер базасының интеграциялануы нәтижесінде студенттер әскерге шақырудан автоматты түрде босатылады", – деді Бағдат Мусин.

Оқи отырыңыз