Қазақстан мен Қытай арасындағы тауар айналымы 15 млн тоннаға жетті

Сурет: pixabay

Достық станциясындағы бұл жаңа терминал екі ай бұрын ғана ашылған. Тәулігіне 8 пойызға қызмет көрсетуге қауқарлы. Жаңа технология контейнерлерді жылдам тасымалдауға мүмкіндік бермек.

Жүк контейнерлерін түсіріп, тиейтін бұл крандардың ерекшелігі жылдамдығы секундына 28 метр жел соқса да жұмысын тоқтатпай істей береді. Дәл қазір бұл терминалда екі кран бар. Келесі жылы тағы да біреуін орнату жоспарланып отыр, деп жазады qazaqstan.tv.

"Бүгінгі таңда 110 қызметкер бар. Бізде вахталық метод болып есептеледі. 15 күн демалып, 15 күн жұмыс жасайды. Бір вахтада алпыс, жетпіс кісіге дейін болады ғой." Асхат Сүлеев, Бас Инженер

Жалпы Достық станциясында он бес терминал бар. Оның бесеуі тек контейнер тиеумен айналысады. Президент жолдауына сәйкес алдағы уақытта терминал санын еселеу жоспарланған.

"Бүгінгі күнге біз 15-16 поез тапсырып жатырмыз. Алдымызда Қытай мемлекетімен үлкен жиналыстар өткізіп, тапсыру жағын одан да үлкейтсек пе деген жұмыстар атқарылып жатыр.18 поезға шейін жұмыс атқарамыз." Мақсат Мәмбетқұлов, Достық станциясының бастығы

Достық станциясында контейнерлерден бөлек автокөлік тасымалдау жоспарланған. Терминалда қазір осы жоба бойынша дайындық жұмыстары пысықталуда.