Тоқаев Қазақстан халқын қасиетті Рамазан айының басталуымен құттықтады

Мемлекет басшысы Қасым-Жомарт Тоқаев Рамазан айының басталуымен құттықтады, сурет - Zakon.kz жаңалық 11.03.2024 09:01

Сурет: akorda.kz

11 наурызда Қазақстан Республикасының Президенті Қасым-Жомарт Тоқаев жерлестерін қасиетті Рамазан айының басталуымен құттықтады, деп хабарлайды Zakon.kz.

Мемлекет басшысының сөзінше халқымыз үшін Қасиетті оразаның мән-маңызы айрықша.

Бұл – қоғамда имандылық, адалдық, жанашырлық, мейірімділік сияқты мызғымас құндылықтарға барынша мән берілетін кезең. Бүкіл мұсылман қауымының ынтымағы артып, бір-біріне бауырмалдығы айқын көрінетін мезгіл, деп атап өтті президент.

"Ораза айы рухани тазаруға, мұқтаж жандарға көмек қолын созып, қайырымдылық жасауға үндейді. Сол арқылы барша адамзаттың береке-бірлігі нығая түсуіне ықпал етеді. Дін мен дәстүр сабақтастығын берік ұстанатын ел татулығын, тұрақтылығы мен тыныштығын сақтап, кез келген сын-қатерден сүрінбей өте алады. Мен Қазақстан халқының әрдайым рухани үндестікте өмір сүріп, болашаққа нық қадам басатынына сенемін. Ораза қабыл болсын! Баршаңызға зор денсаулық, амандық, толайым табыс тілеймін!" Қасым-Жомарт Тоқаев

Бұған дейін Қазақстан мұсылмандары діни басқармасының наиб мүфтиі Кенжәлі Қоңыратбайұлы ортақ пәтуаға сәйкес, қасиетті Рамазан айы 11 наурызда басталатынын айтқан.

5-6 сәуірге қараған түн – Қадыр түні. 10 сәуір – Ораза айт мерекесі.

Пітір садақа ел бойынша 640 теңге (екі келі ұнның орташа бағасы) болып бекітілді.

Оқи отырыңыз