БҚО әкімі өңірде көктемгі су тасқынының алдын алуды күшейтуді тапсырды
Сурет: БҚО әкімінің баспасөз қызметі
Бұл туралы облыс әкімі facebook парақшасында хабарлады.
"Жайық-Көшім суландыру жүйесіне сапарым барысында "Қазсушар" РМК филиалының мамандары су өткізу жүйесінің техникалық мүмкіндіктері және көктемгі су тасқынына дайындық барысы туралы баяндады. Жайық-Көшім суландыру жүйесінің бас нысандары: секундына 125 текшеметр су өткізу мүмкіндігі бар шлюз-реттегіші, секундына 250 текшеметр суды өткізу мүмкіндігі бар су тастағыш иммараты, ұзындығы 22 км құрайтын жеткізуші канал, суды ұстау дамбалары кіреді.
Сурет: БҚО әкімінің баспасөз қызметі
Бұдан кейін Ақжайық ауданы Тоған ауылдық округіндегі Киров су қоймасына бардым.
"Қоймаға жақын жердегі магистральдық каналды механикалық тазарту процесін көріп қайттым. Бүгінде каналдың 8 шақырым аумағы тазартылған. Сонымен қатар бүгінгі күні облысымызда "Батыс Қазақстан облысы Жайық-Көшім ССЖ" Шаған тармағы және Көшім магистральды каналын механикаландырылған тазарту жұмыстары іске асырылуда, жоба аясында 48 км Шаған тармағының табиғи арнасы және 22 км Көшім магистральды каналының арнасы тазаланатын болады. Бұл болашақта Жайық өзенінен судың Жайық-Көшім су жүйесіне құйылу деңгейін арттырады"-деп жазды облыс әкімі.
Сурет: БҚО әкімінің баспасөз қызметі
Қазіргі уақытта БҚО-да Киров су қоймасын жаңғырту жұмыстары жүріп жатыр. Су жүйелері кеңес заманының 60-70 жылдарынан бері жаңғырту жұмыстарын көрмеген.
Сурет: БҚО әкімінің баспасөз қызметі
Былтырғы жылы жауапты Министрлік алдында осы мәселе көтеріліп, тиісті қаржы бөлінді. Осылайша, өткен ғасырда салынған су қоймалары мен нысандарын жаңғырту жұмыстары алғаш рет жүргізілуде.
Сурет: БҚО әкімінің баспасөз қызметі
Нариман Төреғалиев сапарының қорытындысы бойынша жауапты мамандарға су тасқынының алдын алу бағытында барынша белсенді жұмыс жүргізуді тапсырды.
