Премьер-министр Бектенов қазақстандықтарды Наурыз мейрамымен құттықтады
![Олжас Бектенов, сурет - Zakon.kz жаңалық 22.03.2024 12:09](https://kaz.zakon.kz/pbi/WEBP/2024-03-22/file-95ba8eaf-7912-49de-ae18-d1100ad9e45f/400x225.webp)
Бектенов әр шаңыраққа бақ, береке және еліміз үшін жасампаз істерге әрі табысқа толы болуын тіледі.
"Құрметті қазақстандықтар!
Сіздерді Ұлыстың ұлы күні – Наурыз мейрамымен шын жүректен құттықтаймын!
Тіршілік атаулыны түлетіп, жер-жаһанға ізгілік нұрын себетін Әз-Наурызды еліміз дархан пейілмен, жаңаша мазмұнмен атап өтуде.
Бағзыдан ырыс пен берекенің алтын арқауы, молшылық пен игіліктің қайнар бастауы болған ұлық мереке – халқымызды мұратқа жеткізер мызғымас бірліктің, іргесі берік, еңсесі биік елдіктің жаршысына айналды. Жаңарған жыл кемел келешектен үкілі үміт күткен еліміз үшін жасампаз істерге әрі табысқа толы болғай. Әр шаңырақтың ырзық-несібесі артып, арман-мақсаттары орындалсын.
Рухани құндылықтарымызды дәріптейтін Наурыз мерекесі құтты болсын. Қашанда отбасыларыңыздан шаттық пен молшылық кетпесін!
Ұлыс оң, ақ мол болсын!", - делінген құттықтауда.