Жайық өзеніндегі су деңгейі көтерілуіне байланысты адамдарды алдын ала эвакуациялаудың екінші кезеңі басталады
Сурет: БҚО әкімдігі баспасөз қызметі
"2024 жылдың 8 сәуіріндегі жағдай бойынша өзендегі су деңгейі 703 см-ге жетті және көтерілуін жалғастыруда. Өткен жылғы максимум 557 см болған. Су Ресей Федерациясынан келеді, онда су тасқынына байланысты екі су қоймасынан су ағыны белсенді жүруде. Эвакуация пункттері азаматтарды қабылдауға дайын", - деді Нұрлан Байбазаров.
Сурет: БҚО әкімдігі баспасөз қызметі
Батыс Қазақстан облысының әкімі Нариман Төреғалиев өңір тұрғындарынан қиын кезеңде сабырлы болуды және бір-біріне қолдау көрсетуді сұрады.
Сурет: БҚО әкімдігі баспасөз қызметі
Сондай-ақ, ол барлық ресурстар жұмылдырылғанын, Жайық өзенінің жағалауындағы аса қауіпті аймақтарда бөгеттер салынып жатқанын айтты.
"Жағалауды нығайту жұмыстарына 200 бірлік техника мен 1 мыңға жуық адам жұмылдырылған. Басқа аумақтарда да алдын алу шаралары жүргізілуде", - деді Нариман Төреғалиев.
Орал қаласы мен облыстың Жайық өзенінің жағалауында орналасқан төрт ауданда жағалауды нығайту жұмыстары жүргізілуде. Атап айтқанда, Дарын, Байқоныс, Озерный, Володар, Январцево, Ақсу, Рубежинское, т.б ауылдардың маңында уақытша бөгеттер салынады.
Сурет: БҚО әкімдігі баспасөз қызметі
Қала билігі тұрғындардан әкімдік өкілдері мен еріктілердің нұсқауларын орындауды сұрайды. Толық эвакуацияланғаннан кейін қажет болған жағдайда газ, су және электр қуатын беру тоқтатылады. Эвакуацияланған аумақтардағы тәртіпті жергілікті полиция қызметі мен төтенше жағдайлар қызметі қамтамасыз етеді.
