Той-томалақсыз: ҚР Білім министрлігі соңғы қоңырау бойынша ұсыныстар берді
Сурет: Zakon.kz
Қазақстан Республикасының Білім министрі Ғани Бейсембаев 2024 жылдың 30 сәуірінде ведомствоның аппараттық отырысында биылғы жылы еліміздің мектептерінде соңғы қоңыраудың қалай тойланатынын айтты, деп хабарлайды Zakon.kz.
Ғани Бейсембаев биыл 186 мың оқушы мектеп бітіретінін айтты. Олар үшін соңғы қоңырау 25 мамырда соғылады.
"Биылғы оқу жылы 25 мамырда аяқталатындығын қатаң ескертемін. Осыған орай , оқу бағдарламаларын жыл бойына табысты меңгерген 3,8 миллионнан астам еліміздің оқушылары, келесі сыныптарға көшірілсін. Мектептің 1-10 сынып оқушыларына "Білімім Отаныма" тақырыбындағы Бірыңғай сынып сағаттарын өткізу 24 мамыр жұма күніне жоспарлансын. Бұл былтырғы жылдың қыркүйек айында енгізілген "Біртұтас тәрбие бағдарламасы" шеңберінде қабылданған жоспарға сәйкес ұйымдастырылуы тиіс." Ғани Бейсембаев
Ұстаздардың ұсынысы бойынша елімізде мамыр айында - "Ынтымақ айы" айлығын өткізу жоспарланған. Оның аясында "Таза Қазақстан", "Игі істер", "Каникулда кітап оқиық" және т.б. шаралар қарастырылған.
"Сонымен қатар, еліміздегі 186 мың мектеп бітірушілері үшін оқу жылының аяқталуына арналған "Соңғы қоңырау" іс-шарасын 25 мамырда өткізуді тапсырамын. Биылғы жылдың түлектері аталған іс шараны жоғары мәдениеттілікпен, ысырапшылдықсыз, даңғазалықсыз, рухани-адамгершілік деңгейінде өткізетіндіктеріне сенімдімін. Бұл болашақ түлектер үшін өнегелі дәстүрге айналған жаңа форматтағы жоғары мәдениетті алғашқы шара болары сөзсіз. Оқу жылын аяқтауды сапалы ұйымдастыру және қауіпсіздік шараларын сақтау бойынша өңірлік білім басқарамаларының басшыларына дербес жауапкершілік жүктеймін". Ғани Бейсембаев
Жаңалықтан zakon.kz сайтында хабардар болыңыз:
Бөлісу
Если вы видите данное сообщение, значит возникли проблемы с работой системы комментариев. Возможно у вас отключен JavaScript
