Қазақстандағы шетелдік жоғары оқу орындарының филиалдары талапкерлерді қалай іріктейтін болады

Сурет: primeminister.kz

ҚР Ғылым және жоғары білім министрі Саясат Нұрбек 20 маусымда ОКҚ брифингінде Қазақстанда орналасқан шетелдік жоғары оқу орындарының филиалдарына түсушілер үшін қабылдау комиссиясы қалай жұмыс істейтінін айтты, деп хабарлайды Zakon.kz.

Оның айтуынша, министрлік өкілдері өңірлерді аралап, арнайы кәсіптік бағдар беру сессияларын өткізеді.

"Университет қызметкерлері сессияларға қатысып, барлық сұрақтарға жауап береді. Мұнда өте маңызды мәселе – біз ақыры сапаға жұмыс істеп жатқандықтан, шетелдік филиалдарға іріктеуді өздері жүргізуге рұқсат береміз. Яғни, өз талаптарына сәйкес", - деді Саясат Нұрбек.

Ол, мысалы, шетелдік жоғары оқу орнының филиалына түсу кезінде талапкерден шетелге түскендей IELTS сертификатын талап етуі мүмкін екенін атап өтті.

"Бір ғана жеңілдік: бірінші жылы біз тілге қойылатын талаптарды төмендеттік, өйткені оқуға түскендердің барлығы алдымен foundation – дайындық курсынан өтеді. Олар жыл бойы тіл, академиялық жазу, зерттеу әдістерін қарқынды үйренеді. Бакалавриаттың бірінші жылын бастау үшін тіл деңгейін қажетті деңгейге көтеретін уақыт бар. Әрбір ЖОО қабылдауға өзінің қосымша талаптарын белгілейді", - деді спикер ОКҚ алаңында өткен баспасөз конференциясында.

Оның мәліметінше, әрбір ЖОО талапкерлерді қабылдауға қосымша талаптар қояды, ал министрлік бұл мәселелерге араласпайды.

"Оқытушылар арасында міндетті түрде халықаралық мамандар болады. Бұдан басқа, "Болашақ" бағдарламасының түлектері, шетелде білім алған қазақстандықтар белсенді түрде тартылады. Бұл ретте жергілікті серіктес ЖОО өз оқытушыларын шетелдік кеңсеге оқуға жібереді. Мысалы, қазір Эдинбургте 16 қазақстандық оқытушы білім алуда. Бұл қосымша пәндерді жергілікті ресурстар есебінен оқыту үшін жасалып отыр",- деп толықтырды министр.

Сондай-ақ, Саясат Нұрбек Оңтүстік Кореяның үш университетінің филиалдарын Қазақстанда ашуды жоспарлап отырғанын мәлімдеді.

Оқи отырыңыз