Қазақстанның Ішкі істер министрлігі Наталья Садықованың мәлімдемесіне жауап берді
Сурет: ҚР ІІМ
Наталья Садықова Украина қауіпсіздік күштері қылмысқа күдіктілерді анықтағанын мәлімдеді. Тиісті ақпарат Украина прокуратурасының сайтында жарияланған. Ал күдіктілердің бірі – қазақстандық полицей Мейрам Қаратаев.
Сурет: Украинаның прокуратурасы
Бұл мәлімдемеге қатысты ҚР Ішкі істер министрлігі түсініктеме берді.
"Азамат М.Қаратаевқа қатысты, ол сонау 2019 жылдың қаңтарында ішкі істер органдарынан босатылғанын және қазіргі уақытта полиция қызметкері емес екенін хабарлаймыз. Қазір мемлекет басшысының тапсырмасына сәйкес істің барлық мән-жайын анықтау үшін тиісті жедел шаралар қабылдаудамыз. Осы жұмыстардың қорытындысы бойынша қосымша ақпарат берілетін болады", - деді басқармадағылар.
2024 жылы 19 маусымда Қасым-Жомарт Тоқаев Киевте Айдос Садықовты өлтіруге оқталу оқиғасына қатысты пікір білдірді. Ол дипломатиялық департамент пен құқық қорғау органдарына осы оқиғаға қатысты украиналық тарапқа ресми сауал жолдауды тапсырды. Қажет болған жағдайда Қазақстанның ресми органдары шындықты анықтауға көмектесу үшін тергеуге қосылуға дайын. 2024 жылдың 18 маусымында Киевте қазақстандық журналист Айдос Садықовтың өміріне қастандық жасалғаны белгілі болды.
