Мемлекет басшысының атынан бірқатар БАҚ қызметкерлеріне баспана берілді
Сурет: Telegram/Madeniet_aqparat_ministrligi
"Dara" Президенттік бастамалар қорының ұйымдастыруымен өткен іс-шарада масс-медиа саласының қызметкерлеріне пәтер сертификаттарын Қазақстан Республикасы Президентінің кеңесшісі – Баспасөз хатшысы Берік Уәли, Мәдениет және ақпарат министрі Аида Балаева және "Dara" қорының президенті Әсел Шілдебаева салтанатты түрде табыстады, делінген салалық министрлік хабарламасында.
Қазақстан Республикасы Президентінің кеңесшісі – Баспасөз хатшысы Берік Уәли Мемлекет басшысының БАҚ саласын дамытуға айрықша мән беретінін айта келіп, қуаныш иелерін жаңа қонысымен құттықтады.
"Журналистер арасында "біз не мемлекеттік қызметшілердің, не бюджеттік мекеме қызметкерлерінің санатында жоқпыз, мемлекеттік бағдарламалардың игілігін көре алмаймыз" деген мәселе жиі көтерілетін. Президенттің тапсырмасымен сол олқылықтың орны толып, жыл сайын журналистерге баспана беру дәстүрге айналды. Ең бастысы, пәтер кілттері еліміздің дамуына, Мемлекет басшысы жүргізіп отырған реформаларды халыққа жеткізуге елеулі үлес қосып келе жатқан БАҚ өкілдеріне табыс етіледі".Берік Уәли
Сондай-ақ ол баспана шын мәнінде мұқтаж жандарға берілгенін баса атап өтті.
"Атап айтқанда, 21 пәтер көпбалалы отбасыға, 5 пәтер жалғызбасты аналарға берілді. Сонымен қатар отбасында мүмкіндігі шектеулі баласы немесе жұбайы бар 11 азамат баспаналы болды. Пәтер алған БАҚ саласы қызметкерлерінің арасында 6 жанұя осы уақытқа дейін жатаханада тұрып келген. Бұл игі дәстүр алдағы уақытта да жалғасын табады. Бір отбасы баспаналы болса, қуанып, халықтан сүйінші сұрайтын журналистердің үйлі болуы – өте қуанышты жағдай".
Мәдениет және ақпарат министрі Аида Балаева мемлекет әлеуметтік жобаларды толығымен қолдайтынын атап өтті.
"Мемлекет басшысы тұрғын үй мәселесіне көп көңіл бөледі. Қолжетімді баспана бойынша түрлі әлеуметтік жобалардан басқа, Қазақстанның бір миллион үш жүз мыңнан астам азаматы тұрғын үй жағдайын жақсарту үшін, жалпы 3 триллион теңгеден астам зейнетақы жинағын пайдаланғанын да атап өткен жөн. Бұл мемлекеттің өз азаматтарына жердем беруінің теңдессіз тетігі", - деді министр Аида Балаева.
Былтыр Мемлекет басшысының атынан БАҚ қызметкерлеріне бір және екі бөлмелі 65 пәтер, ал биыл 67 пәтер берілді. Нақтырақ айтқанда, 13-і – үш бөлмелі, 45-і – екі бөлмелі, 9-ы – бір бөлмелі пәтерлер.
