Шығыс Қазақстан облысының құтқарушылары жазатайым оқиғаның алдын алды

Алтай қаласының куәгерлері тұрғын үйдің үшінші қабатындағы сынған терезенің алдында отырған баланы байқап, құтқарушыларды көмекке шақырды, деп хабарлайды Zakon.kz.

Оқиға орнына келген қызметкерлер үш иінді сатыны орнатып, терезеде жалғыз отырған бес жасар қызға жетті.

Пәтерде ешкім болған жоқ, кірер есігі құлыптаулы болды.

Құтқарушылар баланы биіктіктен абайлап түсіріп, мән-жайды анықтау үшін учаскелік полиция бөліміне тапсырды.

"Төтенше жағдайлар министрлігі ата-аналардан қырағылықты арттыруды, балаларды қараусыз қалдырмауды сұрайды", - делінген хабарламада.