Павлодарда қызын телефонмен ұрған тұрғынның әрекеті сотта қаралады
Сурет: Zakon.kz
Аталмыш факт 27 шілде күні орын алған. Сыртқы бейнебақылау камерасына сомакат тізгіндеген кішкентай қыз бен әкесі түсіп қалған. Бейнежазбада әкесі қалтасына қолын сұғып, бір зат іздеген, кейін қызының қалтасын да тексерген. Іздеген затын таппаған әкесі қызын алдымен қолымен, кейін телефонымен ұрып жіберген.
"Куәгерлердің айтуынша, әкесі мас болған", – деп жазды Павлодар балалар омбудсмені Сәуле Шәкенева Instagram парақшасында.
Көршілер полицияға телефон соққан, бірақ «құқық бұзушыға қатысты әкімшілік немесе қылмыстық шара қолданбағандықтан» олар бала құқықтары жөніндегі уәкілге жүгінді. Сәуле Шәкенева прокуратурадан қызметтік тексеру жүргізуді сұраған.
Ал облыстық полиция департаменті куәгердің арызы Павлодар қаласының Оңтүстік полиция бөлімінде тіркелгенін хабарлады.
"Қоңырауды өңдеу кезінде білім бөлімінің және бала оқитын мектептің қызметкерлері дереу көрсетілген мекенжайға шақырылды. Істі қарау барысында заңды өкіл – анасы күйеуіне қарсы мәлімдеме жасаудан бас тартты. Әкесі мас болмаған", - деді департаментте.
Ер адамға кәмелетке толмаған балаларды тәрбиелеу мен оқыту, құқықтары мен мүдделерін қорғау, сондай-ақ оларды күтіп-бағу және асырау жөніндегі міндеттерін орындамағаны үшін әкімшілік іс қозғалды. Материал сотқа жіберілді.
