Қазақстан Ұлттық Банкі тағы бір жаңа коллекциялық монеталар шығарады
Фото: Zakon.kz/Максим Золотухин
Тиісті ақпаратты бүгін, 2024 жылғы 9 қыркүйекте ҚР Ұлттық Банкінің баспасөз қызметі мәлімдеді:
"Қазақстан Ұлттық Банкі "Есте қалатын оқиғалар мен біртуар адамдар" сериясынан JOSHY ULYSY. 800 JYL коллекциялық монеталарын айналысқа шығарады".
Монеталардың қай күні сатуға шығарылатыны туралы ақпарат ҚҰБ-тың ресми сайтында қосымша жарияланады.
JOSHY ULYSY. 800 JYL коллекциялық монеталары туралы
Жошы хан – Шыңғыс ханның үлкен ұлы және Алтын Орда атанған Жошы ұлысының негізін қалаушы. Ұлытау облысында маңызды тарихи ескерткіш – Қазақстанның мәдени мұрасының бір бөлігі саналатын Жошы хан кесенесі орналасқан.
Монеталардың дизайнында Жошы хан ескерткішінің бейнесі пайдаланылған. Оның авторы –Қазақстанның белгілі мүсіншісі, монументалист-суретші Ғазиз Ешкенов. Сырт жағында Алтын Орда дәуіріндегі монеталардан коллаж орналасқан.
Монеталар:
– алтын жалатылған, күміс сынамасы – 925/1000, массасы 777,5 грамм, диаметрі 100 мм, дайындау сапасы – "proof", номиналы 5 000 теңгелік, таралымы – 100 (жүз) дана;
Сурет: nationalbank.kz
– алтын жалатылған, күміс сынамасы – 925/1000, массасы 311 грамм, диаметрі 75 мм, дайындау сапасы – "proof", номиналы 2 000 теңгелік, таралымы – 300 (үш жүз) дана;
Сурет: nationalbank.kz
– алтын жалатылған, күміс сынамасы – 925/1000, массасы 31,1 грамм, диаметрі 38,61 мм, дайындау сапасы – "proof", номиналы 1 000 теңгелік, таралымы – 1 000 (бір мың) дана;
Сурет: nationalbank.kz
– МН 25 мельхиор қоспасынан жасалған, массасы 15 грамм, диаметрі 33 мм, дайындау сапасы – "brilliant uncirculated", номиналы 200 теңгелік, таралымы – 8 000 (сегіз мың) дана.
Сурет: nationalbank.kz
"Коллекциялық монеталар Қазақстан Республикасының бүкіл аумағында өздерінің белгіленген құнына сай төлемдердің барлық түрі бойынша қабылдауға, сондай-ақ елдің барлық банкінде банк шоттарына есепке алуға, аударуға, ұсақтауға және айырбастауға жатады". ҚР Ұлттық Банкі
Бұған дейін Қазақстан Ұлттық банкі "Қазақстанды монеталар арқылы таны" монеталар сериясынан WORLD PAINTING коллекциялық монеталарын 2024 жылдың 28 тамызынан бастап сатуға шығарылатынын жеткізді.
