Қазақстан мен Венгрия парламенттерінің басшылары екіжақты ынтымақтастық мәселелерін талқылады
Сурет: Мәжілістің баспасөз қызметі
Будапешт қаласында депутаттар Мажарстан Президенті Тамаш Шуйокпен және Мажарстан Мемлекеттік жиналысының төрағасы Ласло Кёвермен кездесті. Сондай-ақ, Қарсақ қаласының тұрғындармен кездесу өткізді.
Мажарстан Президенті Тамаш Шуйокпен жүздесуде екі ел арасындағы достық пен ынтымақтастық мәселесі кеңінен талқыланды. Мәжіліс төрағасы Орталық Еуропадағы бауырлас халық – мажар еліне ерекше ықыласпен келіп отырғанын айтып, Қазақстан Президенті Қасым-Жомарт Тоқаевтың жолдаған сәлемін жеткізді.
Сурет: Мәжілістің баспасөз қызметі
"Мажарстанмен ынтымақтастықты дамыту – Қазақстанның сыртқы саясатындағы басым бағыттың бірі. Қазақстан мен Мажарстан арасында дипломатиялық қарым-қатынас орнағаннан бері ынтымақтастығымыз – стратегиялық серіктестік деңгейіне жетті. Биыл сол стратегиялық әріптестігімізге 10 жыл толып отыр. Әрине, бұл – көшбасшыларымыздың ерен еңбегінің жемісі", - деді Мәжіліс спикері.
Кездесу барысында сауда-экономикалық, мәдени-гуманитарлық ынтымақтастық мәселелеріне ерекше назар аударылды.
Сурет: Мәжілістің баспасөз қызметі
Мәжіліс
төрағасы Мемлекет басшысы Қасым-Жомарт Тоқаевтың бастамасымен соңғы
жылдары Қазақстанда жүргізіліп жатқан ауқымды реформалар туралы айтып берді. Соның ішінде 6 қазанда өткен
жалпыұлттық референдумға тоқталды.
"Елімізде жаңа саяси мәдениет қалыптасуда. Оның өзегі – барлық маңызды шешімдер қоғаммен бірге талқыланады. Қасым-Жомарт Тоқаев президенттік қызметінің алғашқы күндерінен-ақ осы істі қолға алды. Күні кеше елімізде атом электр стансасын салу мәселесі бойынша жалпыұлттық референдум өтті. Ел болашағына тікелей қатысты болған соң, бұл мәселе жөнінде шешім қабылдауды Мемлекет басшысы халықтың өз еркіне берді. 6 қазанда Қазақстан халқының басым көпшілігі Президенттің бұл бастамасын қолдады. Біз атом өнеркәсібі саласында Мажарстанның тәжірибесі мол екенін білеміз. Осы салада бірлесіп кадр даярлау қолға алынып жатыр. Бұл жұмысты күшейтуге дайынбыз", - деді Мәжіліс спикері.
Сурет: Мәжілістің баспасөз қызметі
Сонан соң Ерлан Қошанов Мажарстан Мемлекеттік жиналысының төрағасы Ласло Кёвермен кездесіп, парламентаралық қарым-қатынастың қазіргі жай-күйі мен келешегін жан-жақты талқылады.
"Біз үшін Мажарстан – сенімді дос, бауырлас мемлекет және стратегиялық серіктес. Сондықтан парламентаралық ынтымақтастықты одан әрі нығайтуға мүдделіміз. Сіздерде де дәл осындай ықылас бар екенін білеміз. Заң шығарушы органдарымызда парламентаралық достық топтары қарқынды жұмыс істеп келеді. Біз халықаралық ұйымдар аясындағы көпжақты форматта да тығыз байланыстамыз. Осы ықпалдастықты одан әрі арттыруға шақырамын", - деді Мәжіліс төрағасы.
Сондай-ақ делегация басшысы мажар әріптестеріне Мәжілістің қазіргі заң шығару қызметі жайлы да ақпарат берді.
Кездесу соңында екі ел Парламент басшылары Қазақстан Республикасы Парламенті Мәжілісі мен Мажарстанның Мемлекеттік Жиналысы арасындағы ынтымақтастық туралы келісімге қол қойды. Бұл қадам парламентаралық байланысты нығайтуға зор септігін тигізетіні анық.
Сурет: Мәжілістің баспасөз қызметі
Сонымен бірге Ерлан Қошанов әріптесі Ласло Кёверді Қазақстанға ресми сапармен келуге шақырды.
Делегация мүшелері Будапешт қаласындағы Астана көшесінде орналасқан Абай Құнанбайұлының
ескерткіші Мажарстанда оқитын Қазақстан студенттерімен кездесті.
Мәжіліс депутаттарының ресми сапары келесі күні Қарсақ қаласында жалғасты. Ерлан Қошанов ондағы жергілікті тұрғындармен – бауырлас қыпшақтармен кездесу өткізді.
"Біз әрқашан өздеріңізге жаны бір, қаны бір бауырларымыз ретінде қараймыз. Қазақ та, мажар да – Еуразияның Ұлы даласында мекен етіп, салтанат құрған ежелгі ғұндар мен түркілердің, қыпшақтардың мұрагері. Бізді генетикалық тамырымыз ғана емес, екі елге ортақ даңқты тарихымыз, бұзылмас дәстүріміз жалғап жатыр. ХХІ ғасырда бауырлас халықтар арасындағы байланыс, соның ішінде қазақ-мажар ынтымақтастығы барынша артып келеді. Осы үрдіс бізді қуантады. Ел мен елді қосатын, дәнекер болатын ең алдымен – сіздер мен біздер. Сондықтан бұл миссияны абыроймен атқарамыз деп сенемін", - деді Мәжіліс спикері.
Сурет: Мәжілістің баспасөз қызметі
Сапар аясында делегация мүшелері Қарсақ қаласында екі елдің ажырамас туыстығы мен мызғымас достығының белгісі ретінде "Домбыра" мүсінінің ашылуына қатысып, мәдени орындарға барды.
Оқи отырыңыз
