Полиция Қаскелең өзенінен ауылдың суару каналына су жіберетін шлюзді ашып жіберген адамды іздестіріп жатыр

Бүгін, 16 ақпанда Алматы облысы Қарасай ауданы Көлашы ауылында бейтаныс адам шаруашылық қажеттіліктері үшін Қаскелең өзенінен ауылдың суару каналына су жіберетін шлюзді ашып жіберген, деп хабарлайды Zakon.kz.

Осының салдарынан төрт ауланы су басып қалды.

Төтенше жағдайлар министрлігінің хабарлауынша, бұл аула аумақтары елді мекеннен тыс жерлерде ауыл шаруашылығы алқаптарында ретсіз салынған.

Оқиға орнында төтенше жағдайлар департаментінің жеті қызметкері, екі бірлік техника және екі мотопомпа, ЖАО 3 адам және бір бірлік техника жұмылдырылды.

Сондай-ақ, оқиға орнында Қарасай ауданы полиция басқармасы қызметкерлері шлюзді ашқан белгісіз адамды іздестіріп жатыр. Аэровизуалды тексеру және дұрыс шешім қабылдау үшін ҰҰА тартылған.