Қызына пышақ сұғып алған көпбалалы ана 6 жылға темір торға қамалды

Солтүстік Қазақстан облысында әйел қызының оқу үлгеріміне байланысты денсаулығына ауыр зиян келтіргені үшін сотталды, деп хабарлайды Zakon.kz.

Кәмелетке толмағандар істері жөніндегі ауданаралық соттың баспасөз қызметінің мәліметінше, әйел қызының үй тапсырмасын тексеру кезінде оның мектеп дәптерін дұрыс жүргізбегенін анықтаған. Осылайша, ашуға булыққан ана оқушының оң және сол жақ жамбасына ас үй пышағын сұғып алған.

Сотта әйел кінәсін толық мойындады. Оның қорғаушысы мен қызы оған бас бостандығынан айыруға байланысты емес жаза тағайындауды сұрады.

"Сот бұл айыпталушының алғашқы соттылығы екенін және оның жүкті екенін ескере отырып, ең төменгі жазаны тағайындады – алты жылға бас бостандығынан айыру. Жазаны өтеу орны ретінде орташа қауіпсіздік қылмыстық-атқару жүйесінің мекемесі айқындалды. Сот шартты түрде соттауға негіз жоқ екенін анықтады", – делінген ақпаратта.

Үкім заңды күшіне енген жоқ.

Бұған дейін Алматыда заңсыз қайта жабдықталған автобустар айыппұл тұрағына қойылғандығы хабарланған болатын.