Қазақстанда кейінгі үш күн ішінде 30-дан астам қару жасырынған жер анықталды

Ішкі істер министрлігі ел аумағында "Қару" жедел-профилактикалық іс-шарасын өткізді, деп хабарлайды Zakon.kz.

Ведомствоның мәліметінше, үш күн ішінде 30-дан астам қару жасырылған жер анықталып, 360 түрлі атыс қару, 12 граната және үш мыңнан астам оқ-дәрі тәркіленді.

"Сонымен қатар бұрын ұрланған жеті қару анықталды, оның төртеуі қаңтар оқиғасы кезінде ұрланған. Бұдан бөлек, бұрын жоғалған алты қару тәркіленіп, 14 қару ерікті түрде тапсырылды", - деді ІІМ криминалдық полиция департаментінің бастығы Қанат Нұрмағамбетов.

Шара барысында атыс қаруын заңсыз сақтау және алып жүрудің 120 фактісі анықталып, 200 адам әкімшілік жауапкершілікке тартылды.