Қарағанды ​​облысында 15 жастағы қызды өгей әкесі күйеуге берген: қылмыстық іс қозғалды

Қарағанды ​​облысында 15 жастағы қызға қатысты қылмыс жасады деген күдікпен 38 жастағы ер адам ұсталды. Бұл туралы 16 наурызда облыстық полиция департаментінің баспасөз қызметі мәлімдеді, деп хабарлайды Zakon.kz.

Ведомствоның мәліметінше, арыз полицияға 15 наурызда түскен. Сол күні қылмыстық іс қозғалып, күдікті ұсталып, уақытша ұстау изоляторына қамалды.

"Қазіргі уақытта тергеу аясында оқиғаның барлық мән-жайын анықтауға бағытталған қажетті сот-медициналық сараптамалар жүргізіліп жатыр", - деп хабарлады департамент.

Бұл оқиғаға ҚР Оқу-ағарту министрлігі Балалардың құқықтарын қорғау комитеті де түсінік берді.

"Қыз туған әкесінің қасында, оған барлық қажетті психологиялық көмек көрсетіліп жатыр және құқықтық қолдау көрсетіледі. Облыстық балалар құқықтары жөніндегі уәкіл әкесімен байланыста, сонымен қатар өгей әке мен анасын қылмыстық жауапкершілікке тарту туралы өтініш берді. Балалардың құқықтарын қорғау комитеті жағдайды назарда ұстап, баланың құқығын қорғау үшін барлық шараны қабылдап жатыр", - делінген хабарламада.