Алматыда екі студент өз өмірін қатерге тігіп, бір отбасын ажалдан аман алып қалды

Абай атындағы қазақ ұлттық педагогикалық университетінің студенттері, 20 жастағы Ернар Тұрсын және 22 жастағы Нұрасыл Әлімтаев "Өртте көрсеткен қайсарлығы үшін" медальдарымен марапатталды, деп хабарлайды Zakon.kz.

Оқиға 2 наурызда болған. Алматыдағы Жетісу ауданында жеке меншік тұрғын үйдің екі бөлмесі мен шатыры өртенген.

Ернар мен Нұрасыл үйіне оралған кезде жанып жатқан ғимаратты байқаған. Олар көмек сұраған дауысты естіп, бұл оқиға туралы 112-ге дереу хабарлап, қою түтін мен қауіпке қарамастан, жанып жатқан үйге қарай жүгірген.

Олардың батылдығының арқасында 64 жастағы әйел, 17 жастағы және 6 жастағы қыз аман қалды.

Кейінірек студенттер өртті өз бетінше сөндіруге тырысқан, бірақ бұл мүмкін болмаған.