Алматыдағы әуежайда оқу-жаттығулар өтеді: азаматтарды жалған ақпарат таратпауға шақырды

21 сәуірде Алматы халықаралық әуежайының аумағында сағат 09:00-ден 17:00-ге дейін жоспарлы антитеррорлық оқу-жаттығулар өтеді, деп хабарлайды Zakon.kz.

Терроризмге қарсы күрес жөніндегі ведомство мәліметінше, шара кезінде әуе және автокөліктердің қозғалысына шектеулер енгізілмеген. Оқу тапсырмалары адамдар көп жиналатын жерлерде лаңкестік әрекеттердің алдын алу механизмін жетілдіруге бағытталған.

"Қауіпсіздік шараларын сақтауыңызды және қатысы бар мемлекеттік қызметкерлердің заңды талаптарын орындауыңызды сұраймыз. Сондай-ақ ресми ақпарат көздерін қадағалап, жалған ақпарат таратпау керек",- делінген ақпаратта.

Сонымен қатар, штаб ҚР "Әкімшілік құқық бұзушылық туралы" Кодексінің 443-бабына сәйкес, қоғамдық тәртіпті қамтамасыз етуге қатысушы тұлғаның заңды талабына бағынбау әкімшілік жауапкершілікке әкеп соғатынын ескертті.

Бұған дейін Мемлекет басшысының Кендірлі курорты аумағындағы әуежай құрылысын тезірек аяқтауды тапсырғандығы хабарланған болатын.