Шымкент тұрғынынан 83 шелек марихуана табылды

Шымкент тұрғыны марихуана сатты деген күдікпен ұсталды. Жедел уәкілдер одан есірткі заттарының үлкен көлемін анықтаған, деп хабарлайды Zakon.kz.

Қалалық прокуратураның мәліметінше, бірлескен жедел-іздестіру шаралары барысында фитозертхананың қызметі тоқтатылған.

"Заңсыз айналымнан арнайы жабдықталған бөлмеде сақталған 83 көк пластик шелектегі марихуана тәркіленді. Сондай-ақ полиэтилен қалташаларға бөлініп салынған есірткі заттары мен электронды таразы табылды", - делінген хабарламада.

Зертхананы ұйымдастырды деген күдікті ұсталып, қамауға алынды. Қазіргі уақытта алдын ала тергеу жүргізіліп жатыр.

Егер ер адамның кінәсі дәлелденсе, оған жеті жылдан он екі жылға дейін бас бостандығынан айыру және мүлкін тәркілеу жазасы қолданылуы мүмкін.