Қазақстан ІІМ мас күйінде көлік жүргізгендерге кешірім беру туралы өтінішке жауап берді

26 маусым күні Ішкі істер министрлігі Әкімшілік полиция комитетінің төрағасы Қайсар Сұлтанбаев бұған дейін мас күйінде көлік тізгіндеген жүргізушілерге кешірім жасап, жүргізуші куәлігін қайтару туралы өтініштерге жауап берді, деп хабарлайды Zakon.kz.

Қайсар Сұлтанбаевтың айтуынша, қазіргі кезде жүргізуші куәлігінен айырылған азаматтар өздеріне рақымшылық жариялауды сұрап жүр.

"Олар ҚР ӘҚБтК-нің 608-бабы – "Алкогольдік, есірткілік және (немесе) уытқұмарлық масаң күйдегі адамның көлік құралын басқаруы" бойынша жауапқа тартылған. Бұл бапқа сәйкес, 15 тәулікке дейін әкімшілік қамауға алынып, көлік құралын басқару құқығынан жеті жыл мерзімге айырылады", - деп еске салды ол.

Алайда, комитет төрағасының айтуынша, бұл мәселеге қоғамда әртүрлі көзқарас бар: біреулер рақымшылық жасауды ұсынса, енді біреулер жазаны жұмсартуды жөн санайды.

"Бұл тақырып БАҚ пен әлеуметтік желілерде кеңінен талқыланды. Біз пікірлерді мұқият бақыладық. Нәтижесінде халықтың 90%-ы бұл ұсыныстарға қарсы. Халық түсініп отыр: ол адам мас күйінде рөлге отырды – яғни, ол потенциалды қылмыскер. Ал ең көп шағымданып жүрген – сол мас күйде көлік жүргізгендер. Сонда олар мұны істемес бұрын не ойлады? Олар – ересек, заңды білетін азаматтар. Соған қарамастан, заңды бұзды. Ал қазір: "Табыстан айырылдық, жұмыс жоқ" дейді. Рақымшылық жасалмайды – бұл ІІМ-нің ұстанымы", - деді Сұлтанбаев.